ស្វាយរៀង៖ ព្រឹកថ្ងៃទី១៤ ខែមីនា ឆ្នាំ២០២១ នៅសាលាស្រុករមាសហែក ខេត្តស្វាយរៀង លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានក្រុមការងារថ្នាក់ជាតិចុះជួយស្រុករមាសហែក បានអញ្ជើញជាអធិបតីភាពក្នុងពិធីប្រគល់អំណោយជូនដល់សាលាស្រុក មន្ទីរពេទ្យបង្អែកស្រុក និងមណ្ឌលសុខភាពតាមបណ្តាឃុំ ដើម្បីចូលរួមប្រយុទ្ធនិងទប់ស្កាត់ជំងឺឆ្លងកូវីដ-១៩។ អំណោយរួមមាន រថយន្តចំនួន១គ្រឿង ម៉ូតូចំនួន១គ្រឿង ជូនសាលាស្រុករមាសហែក និងម៉ូតូចំនួន១៦គ្រឿង ជូនមណ្ឌលសុខភាពតាមបណ្ដាឃុំទាំង១៦ ក្នុងស្រុករមាសហែក ព្រមទាំងឧបករណ៍វាស់កម្តៅចំនួន៥០ ប្រគល់ជូនមន្ទីរពេទ្យបង្អែកស្រុករមាសហែក។
