ព្រៃវែងៈ នៅវេលាម៉ោង១៦ និង១៥នាទី ល្ងាចថ្ងៃទី២០ ខែសីហា ឆ្នាំ២០១៦ កម្លាំងមូលដ្ឋានកងរាជអាវុធហត្ថស្រុកពាមរក៌ បានធ្វើការឃាត់ខ្លួនយុវជនម្នាក់ សង្ស័យជាប់ពាក់ព័ន្ធជាមួយសារធាតុញៀន ស្ថិតនៅចំណុចភូមិចាក់ខ្លាញ់ ឃុំពាមរក៌ ស្រុកពាមរក៌ ខេត្តព្រៃវែង។

បើតាមប្រភពពត៌មានពីភ្នាក់ងារ GRK News ប្រចាំខេត្តព្រៃវែង បានឱ្យដឹងថា ជនសង្ស័យដែលត្រូវកម្លាំងកងរាជអាវុធហត្ថធ្វើការឃាត់ខ្លួន នោះមានឈ្មោះ ចាន់ សុវណ្ណារ៉ូ ភេទប្រុស អាយុ១៦ឆ្នាំ រស់នៅភូមិបាទី ឃុំពាមរក៌ ស្រុកពាមរក៌ ខេត្តព្រៃវែង។

ភ្នាក់ងារដដែលបានបន្តឱ្យដឹងទៀតថា កម្លាំងកងរាជអាវុធហត្ថបានចាប់យកវត្ថុតាង មួយចំនួនពីជនសង្ស័យរួមមានៈ
០១. ថ្នាំញៀនប្រភេទម៉ាទឹកកកចំនួន ០២កញ្ចប់
០២. ម៉ូតូ ចំនួន០១ គ្រឿង

ជនសង្ស័យ និងវត្ថុតាង ត្រូវបានបញ្ជូនទៅការិយាល័យប្រឆាំងបទល្មើសគ្រឿងញៀន កងរាជអាវុធហត្ថខេត្តព្រៃវែង ដើម្បីសាកសួរពត៌មានបន្ថែម និងកសាងសំណុំរឿង ចាត់ការបន្តតាមនីតិវិធី៕