ក្រចេះៈ នៅវេលាម៉ោង២៣ និង៣០នាទីយប់ ថ្ងៃទី២៤ ខែសីហា ឆ្នាំ២០១៦ កម្លាំងមូលដ្ឋានកងរាជអាវុធហត្ថស្រុកស្នួល សហការជាមួយខណ្ឌរដ្ឋបាលព្រៃឈើស្រុកស្នួល បានធ្វើការឃាត់់ខ្លួនបុរសម្នាក់ ពាក់ព័ន្ធជាមួយបទល្មើសព្រៃឈើ ស្ថិតនៅចំណុច ផ្លូវ 7A ភូមិកាត់ដែ ឃុំ ស្នួល ស្រុកស្នួល ខេត្តក្រចេះ។

បើតាមសំដី លោកវរសេនីយ៍ទោ ស៊្រុន សោភ័ណ្ឌ មន្ត្រីកងរាជអាវុធហត្ថខេត្តក្រចេះ បានប្រាប់ភ្នាក់ងារ GRK News ឲ្យដឹងថា ការធ្វើការបង្ក្រាប និងឃាត់ខ្លួនជនល្មើសនេះ គឺស្របពេលដែលជនល្មើស កំពុងតែដឹកឈើប្រណិត ធ្វើដំណើរទៅតាមផ្លូវកើតហេតុខាងលើ បំរុងយកទៅលក់បន្ត។

មន្ត្រីដដែលបានបន្តទៀតថា ជនល្មើសដែលត្រូវកម្លាំងកងរាជអាវុធហត្ថធ្វើការឃាត់ខ្លួននោះ មានឈ្មោះ ណាល់ នូ ភេទប្រុស អាយុ២៩ឆ្នាំ ជនជាតិខ្មែរ រស់នៅភូមិដោះក្រមុំ ឃុំសុខដុម ក្រុងសែនមនោរម្យ ខេត្តមណ្ឌលគិរី។

មន្ត្រីដដែលបានបញ្ជាក់ទៀតថា កម្លាំងកងរាជអាវុធហត្ថបានធ្វើការចាប់យកវត្ថុតាងមួយចំនួនរួមមានៈ
០១. រថយន្តចំនួន ០១គ្រឿង ម៉ាក កាម៉េរី ឆ្នាំ២០០២
០២. ឈើប្រណិតប្រភេទ សុក្រំ ចំនួន ៧ដុំ ស្មើនឹង ១៨០៥ម៉ែត្រគូប។

ជនសង្ស័យត្រូវបានកម្លាំងកងរាជអាវុធហត្ថស្រុកស្នួល កំពុងសាកសួរពត៌មានបន្ថែម ដើម្បីកសាង សំណុំរឿង បញ្ចូនបន្តតាមនីតិវិធី ចំណែកវត្ថុតាងត្រូវកម្លាំងកងរាជអាវុធហត្ថប្រគល់ជូន ខណ្ឌរដ្ឋបាលព្រៃឈើ ដើម្បីកសាងសំណុំរឿងចាត់ការបន្តតាមនីតិវិធី។