បន្ទាយមានជ័យៈ នៅវេលាម៉ោង០៩យប់ ថ្ងៃទី២៤ ខែសីហា ឆ្នាំ២០១៦ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានធ្វើការឃាត់ខ្លួនជនសង្ស័យម្នាក់ ក្នុងចំណោមបក្ខពួកចំនួន០៦នាក់ ពាក់ព័ន្ធករណីលួច ដោយហិង្សា ស្ថិតនៅចំណុច
បរិវេនក្រុមហ៊ុនកាស៊ីណូផ្កាយប្រាំ ក្នុងភូមិក្បាលស្បាន សង្កាត់ប៉ោយប៉ែត ក្រុងប៉ោប៉ែត ខេត្តបន្ទាយមានជ័យ។
បើតាមសំដីមន្ត្រីកងរាជអាវុធហត្ថខេត្តបន្ទាយមានជ័យបានឱ្យដឹងថា ជនសង្ស័យទាំង០៦នាក់នោះ បាន អុកឡុកលើបក្ខពួកមួយក្រុមទៀត បណ្តាលឲ្យរងរបួសធ្ងន់ចំនួន០២នាក់។
មន្ត្រីដដែលបានបន្តទៀតថា ការឃាត់ខ្លួនជនសង្ស័យនេះ គឺធ្វើឡើងទៅតាមពាក្យបណ្តឹងរបស់ជនរងគ្រោះចំនួន០២នាក់ ដែលមានឈ្មោះៈ
០១.បាន សុភ័ក្រ ភេទប្រុស អាយុ២៨ឆ្នាំ មុខរបរកម្មករ ស្នាក់នៅបណ្តោះអាសន្ន ក្នុងបរិវេនកាស៊ីណូផ្កាយប្រាំ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ
០២. វ៉ាក់ សាំ ភេទប្រុស អាយុ២៥ឆ្នាំ រស់នៅក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ជនរងគ្រោះបានបន្តឱ្យដឹងទៀតថា ជនសង្ស័យបានលួចយកទូរស័ព្ទរបស់ខ្លួនចំនួន០១គ្រឿងផងដែរ នៅពេលដែលខ្លួនកំពុងសាកថ្មទូរស័ព្ទ។
នៅមុខកម្លាំងកងរាជអាវុធហត្ថ ជនសង្ស័យបានឆ្លើយសារភាពថា ខ្លួន និងបក្ខពួកទាំង០៥នាក់ទៀត ពិតជាបានធ្វើសកម្មភាពដេញវាយកម្មករជាច្រើននាក់ដែលផឹកស៊ី នៅជិតខ្លួនពិតប្រាដកមែន ដោយសារតែមានមិត្តខ្លួនម្នាក់ បានមកប្រាប់ខ្លួនថា បក្ខដែលខ្លួនវាយប្រហារនោះ បានវាយមកលើបក្ខ ខ្លួនមុនទើបខ្លួនវាយតដៃយ៉ាងដូច្នេះ។
ជនសង្ស័យត្រូវកម្លាំងកងរាជអាវុធហត្ថក្រុងប៉ោយប៉ែត កំពុងសាកសួរពត៌មានបន្ថែម ដើម្បីកសាងសំណុំរឿង ចាត់ការបន្តតាមនីតិវិធី។ ចំណែកជនបង្កទាំង០៥នាក់ទៀត ត្រូវកម្លាំងកងរាជអាវុធហត្ថ កំពុងស្វែងរក ដើម្បីយកមកផ្តន្ទាទោសតាមច្បាប់។
