យើងខ្ញុំទាំងអស់គ្នាមានក្តីរំជួលចិត្តឥតឧបមា បន្ទាប់ពីបានទទួលដំណឹង ដ៏ក្រៀមក្រំអំពីមរណភាពរបស់ ឯកឧត្តម ត្រាំ អុីវតឹក ទេសរដ្ឋមន្ត្រី ទទួលបន្ទុកបេសកកម្មពិសេស នៅរសៀលថ្ងៃអង្គារ ៦រោច ខែជេស្ឋ ឆ្នាំឆ្លូវ ត្រីស័ក
ព.ស.២៥៦៥ ត្រូវនឹងថ្ងៃទី០១ ខែមិថុនា ឆ្នាំ២០២១ ក្នុងជន្មាយុ៧៣ឆ្នាំ ដោយរោគាពាធ។ ការទទួលមរណភាពរបស់ ឯកឧត្តម ត្រាំ អុីវតឹក គឺជាការបាត់បង់នូវស្វាមីដ៏ឧត្តុងឧត្តម ឪពុក ជីតា ប្រកបដោយព្រហ្មវិហារធម៌ ព្រមទាំង ជាការបាត់បង់នូវឥស្សរជនឆ្នើមមួយរូបដែលពេញមួយជីវិតបានរួមចំណែកយ៉ាងសកម្មជាមួយរាជរដ្ឋាភិបាលក្នុងកិច្ចការបម្រើជាតិមាតុភូមិប្រកបដោយស្មារតីទទួលខុសត្រូវខ្ពស់។ ខ្ញុំ និងភរិយា ព្រមទាំងនាយទាហាន នាយទាហានរងនៃកងរាជអាវុធហត្ថទាំងអស់ សូមចូលរួមរំលែកនូវមរណទុក្ខដ៏ក្រៀមក្រំនេះជាមួយ លោកជំទាវ ឈរ ណារី ត្រាំ អុីវតឹក ព្រមទាំងក្រុមគ្រួសារទាំងអស់នៃសព និងសូមឧទ្ទិសបួងសួងដល់ដួងវិញ្ញាណក្ខន្ធរបស់
ឯកឧត្តម ត្រាំ អុីវតឹក បានចាប់កំណើតក្នុងសុគតិភពគ្រប់ៗជាតិកុំបីឃ្លៀងឃ្លាតឡើយ។
គោរពចូលរួមមរណទុក្ខពី នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងលោកជំទាវ ព្រមទាំងនាយទាហាន នាយទាហានរងនៃកងរាជអាវុធហត្ថទាំងអស់