បន្ទាយមានជ័យ៖ យោងតាមពាក្យបណ្ដឹងរបស់ដើមបណ្ដឹងឈ្មោះ គង់ គន្ធា ភេទស្រី អាយុ២៦ឆ្នាំ បច្ចុប្បន្នរស់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ស្ដីពីករណីលួចម៉ូតូ កាលពីវេលាម៉ោង២៣ និង០០នាទី ថ្ងៃទី០៤ ខែមិថុនា ឆ្នាំ២០២១ នៅចំណុចក្នុងផ្ទះសំណាក់ ឈាន ទាវ  ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋាន កងរាជអាវុធហត្ថក្រុងប៉ោយប៉ែតបានចាត់តាំងកម្លាំងជំនាញចុះដល់កន្លែងកើតហេតុហើយធ្វើការស្រាវជ្រាវរហូតឈានដល់ការឃាត់ខ្លួនបានជនសង្ស័យម្នាក់ឈ្មោះ គឹម តាក់វ៉ាន់ ភេទប្រុស អាយុ១៧ឆ្នាំ ព្រមទាំងដកហូតម៉ូតូ០១គ្រឿងម៉ាកសូម័រអ៊ិច ពណ៌ក្រហមលាយស គ្មានស្លាកលេខ ដែលមានភិនភាគដូចក្នុងពាក្យបណ្ដឹងខាងលើ។

បច្ចុប្បន្ន ជនសង្ស័យត្រូវបានកម្លាំងជំនាញកសាងសំណុំរឿងតាមនីតិវិធី ចំណែកម៉ូតូបានប្រគល់ឱ្យម្ចាស់ដើមវិញ។