បន្ទាយមានជ័យៈ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ឃាត់ខ្លួនជនសង្ស័យម្នាក់ ពាក់ព័ន្ធករណីលួច ស្ថិតនៅចំណុចផ្លូវចូលផ្សាររ៉ាថ្មី ស្ថិតក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ នៅវេលាម៉ោង១៩ល្ងាច ថ្ងៃទី២៨ ខែសីហា ឆ្នាំ២០១៦។ ក្រោយពីឃាត់ខ្លួនបានហើយ ជនសង្ស័យត្រូវបានកម្លាំងអាវុធហត្ថក្រុងប៉ោយប៉ែត បញ្ជូនមក
បញ្ជាការដ្ឋានកងរាជអាវុធហត្ថខេត្ត ដើម្បីធ្វើការសាកសួរ។ បើតាមសំដី លោក វរ:សេនីយ៍ត្រី ជា ដា មេបញ្ជាការ មូលដ្ឋានកងរាជអាវុធហត្ថក្រុងប៉ោយប៉ែត បានប្រាប់ភ្នាក់ងារ GRK News ថា ការឃាត់ខ្លួននេះ យោងទៅតាមពាក្យបណ្តឹងរបស់ជនរងគ្រោះឈ្មោះ សោម ច្រិល ភេទប្រុស អាយុអាយុ២៤ឆ្នាំ រស់នៅក្នុងភូមិផ្សាររ៉ាថ្មី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានធ្វើការប្តឹងឈ្មោះកែវ សាគរ ភេទប្រុស អាយុ៣៦ឆ្នាំ មានទីលំនៅមិនពិតប្រាកដ បានលួចម៉ូតូម៉ាកហុងដាឌ្រីម c១២៥ ព៌ណខ្មៅ សេរី២០១១ពាក់ស្លាកលេខភ្នំពេញ ១AX ៦៤៩០ របស់ខ្លួននៅចំណុចផ្សាររ៉ាថ្មី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ក្រោយពីទទួលបានពាក្យបណ្ដឹងហើយ កម្លាំងអាវុធហត្ថក្រុងប៉ោយប៉ែត បានចុះទៅដល់កន្លែងកើតហេតុហើយធ្វើការឃាត់ខ្លួនជនសង្ស័យ បានភ្លាមៗផងដែរ។ លោកវរ:សេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលលើការងារយុត្តិធម៌ បានឲ្យដឹងថាទៀតថា នៅមុខមន្ត្រីអាវុធហត្ថខេត្ត ជនសង្ស័យបានឆ្លើយសារភាពថា ខ្លួនគេពិតជាបានលួចម៉ូតូពីឈ្មោះ សោម ច្រិល ពិតប្រាកដមែន។ ក្រោយពីបានចម្លើយសារភាពហើយនោះ ជនសង្ស័យត្រូវបានកម្លាំងកងរាជអាវុធហត្ថខេត្ត កសាងសំណុំរឿងបញ្ជូនទៅតុលាការ ដើម្បីចាត់ការបន្តតាមនីតិវិធី។ ចំណែកម៉ូតូត្រូវបានមន្ត្រីអាវុធហត្ថបានប្រគល់ទៅឲ្យម្ចាស់ដើមវិញហើយ៕