ភ្នំពេញៈ នៅវេលាម៉ោង១៣ និង០០នាទី រសៀល ថ្ងៃទី២៩ ខែសីហា ឆ្នាំ២០១៦ កម្លាំងមូលដ្ឋានកងរាជអាវុធហត្ថខណ្ឌចំការមន បានធ្វើការឃាត់ខ្លួនជនសង្ស័យចំនួន០២នាក់ សង្ស័យជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន ស្ថិតនៅចំណុច ម្តុំផ្លូវដែក សង្កាត់ស្រះចក ខណ្ឌដូនពេញ រាជធានីភ្នំពេញ។

បើតាមប្រភពពត៌មានពីមន្ត្រីកងរាជអាវុធហត្ថរាជធានីភ្នំពេញ បានប្រាប់ភ្នាក់ងារ GRK News ឱ្យដឹងថា ជនសង្ស័យដែលត្រូវកម្លាំង កងរាជអាវុធហត្ថធ្វើការឃាត់ខ្លួននោះរួមមានឈ្មោះៈ
០១. គង់ វ៉ាន់ ភេទប្រុស អាយុ៤៩ឆ្នាំ ជនជាតិខ្មែរ មុខរបរ មិនពិតប្រាកដ ទីលំនៅមិនពិតប្រាកដ មានស្រុកកំណើតនៅភូមិស្វាយ ស្រុកបារាយ ខេត្តកំពង់ធំ
០២. បូរ វាសនា ភេទប្រុស អាយុ២៣ឆ្នាំ ជនជាតិខ្មែរ មុខរបរសន្តិសុខ ស្នាក់នៅផ្ទះ8Bផ្លូវដែក សង្កាត់ស្រះ
ចក ខណ្ឌដូនពេញ រាជធានីភ្នំពេញ។

មន្ត្រីកងរាជអាវុធហត្ថដដែល បានបន្តឱ្យដឹងថាទៀតថា ការឃាត់ខ្លួនជនសង្ស័យនេះ គឺធ្វើឡើងទៅបានដោយមានការសហការ ជាមួយកម្លាំងការិយាល័យគ្រឿងញៀន កងរាជអាវុធហត្ថរាជធានីភ្នំពេញ បានចុះឆែកឆេរផ្ទះនៅចំណុចកើតហេតុខាងលើ ដោយបានការអនុញ្ញាតិពី លោកព្រះរាជអាជ្ញាររង អមអយ្យការសាលាដំបូងរាជធានីភ្នំពេញ។

មន្ត្រីដដែលបានបញ្ជាក់បន្តឱ្យដឹងថាទៀតថា កម្លាំងកងរាជអាវុធហត្ថបានធ្វើការចាប់យកវត្ថុតាង មួយចំនួនពីជនសង្ស័យរួមមានៈ
០១. ថ្នាំញៀនប្រភេទម៉ាទឹកកកចំនួន៣៧កញ្ចប់
០២.ម៉ូតូ ចំនួន០២គ្រឿង
០៣. ទូរស័ព្ទចំនួន ០៥គ្រឿង
០៤. លុយចំនួន២០ម៉ឺនរៀល។

ជនសង្ស័យ និវត្ថុតាង ត្រូវបានកម្លាំងកងរាជអាវុធហត្ថរាជធានីភ្នំពេញ កំពុងសាកសួរពត៌មានបន្ថែម ដើម្បីកសាងសំណុំរឿង បញ្ចូនបន្តតាមនីតិវិធី។