បន្ទាយមានជ័យៈ កម្លាំងកងរាជអាវុធហត្ថខេត្តបន្ទាយមានជ័យ សហការណ៍ជាមួយកម្លាំងកងរាជអាវុធហត្ថក្រុងសិរីសោភ័ណ្ឌ បានចុះប្រតិបត្តិការបង្ក្រាបករណីគ្រឿងញៀនមួយកន្លែងស្ថិតនៅចំណុចក្នុងភូមិព្រហូត សង្កាត់អូរអំបិល ក្រុងសិរីសោភ័ណ្ឌ ខេត្តបន្ទាយមានជ័យ នៅវេលាម៉ោង១២ និង០០នាទីថ្ងៃត្រង់ ថ្ងៃទី២៩ ខែសីហា ឆ្នាំ២០១៦ និងបានធ្វើការឃាត់ខ្លួនជនសង្ស័យម្នាក់ ដែលមានឈ្មោះ សាន់ វ៉ាន់មីន ភេទប្រុស អាយុ៣៦ឆ្នាំ មុខរបរធ្វើស្រែ រស់នៅក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ
និងចាប់យកវត្ថុតាងមួយចំនួនពីជនសង្ស័យរួមមានៈ
០១. ថ្នាំញៀនមេតំហ្វេតាមីនទឹកកកចំនួន០២កញ្ចប់ ដែលមានទម្ងន់ស្មើ០.៧១ក្រាម
០២. ថ្នាំញៀនមេតំហ្វេតាមីនគ្រាប់ចំនួន៣គ្រាប់
០៣. ទូរស័ព្ទដៃចំនួន ០១គ្រឿង និងសម្ភារៈសម្រាប់វិចខ្ចប់មួយចំនួន។

ក្រោយពីឃាត់ខ្លួន ជនសង្ស័យត្រូវបានកម្លាំងកងរាជអាវុធហត្ថបានបញ្ជូនមកបញ្ជាការដ្ឋានខេត្ត ដើម្បីធ្វើការសាកសួរ។ បន្ទាប់ពីធ្វើការសាកសួររួចមក ជនសង្ស័យបានសារភាពថា ខ្លួនបានទិញគ្រឿងញៀនពីបុរសម្នាក់ទៀត ដែលមានឈ្មោះ សម្បត្តិ ប៊ុនរ៉ន ភេទប្រុស អាយុ១៧ឆ្នាំ រស់នៅក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។ ក្រោយពីទទួលបានចម្លើយសារភាពពីជនសង្ស័យហើយនោះ កម្លាំងកងរាជអាវុធហត្ថ បានចុះទៅឃាត់ខ្លួនជនសង្ស័យម្នាក់នោះភ្លាមៗ និងធ្វើកាឆែកឆេរក្នុងបន្ទប់ជនសង្ស័យ ដោយបានរកឃើញគ្រឿងញៀនចំនួន០៦កញ្ចប់តូច ដែលមានទម្ងន់ស្មើ ៣.៦ក្រាម និងទូរស័ព្ទចំនួន ០១គ្រឿង។

បើតាមសំដីមន្ត្រីកងរាជអាវុធហត្ថខេត្តបន្ទាយមានជ័យ បានអោយដឹងថា ជនសង្ស័យបានបំផ្លាញគ្រឿងញៀនចោលនៅក្នុងបន្ទប់ទឹក អស់មួយចំនួនហើយ មុនពេលដែលកម្លាំងកងរាជអាវុធហត្ថបានទៅដល់។

មន្ត្រីកងរាជអាវុធហត្ថដដែលបានបន្តអោយដឹងទៀតថា កន្លងមក ជនសង្ស័យឈ្មោះ សាន់ វ៉ាន់មីន នេះ គឺជាបងធំម្នាក់ និងជាអ្នកជួញដូរគ្រឿងញៀននៅក្នុងភូមិនេះយ៉ាងខ្លាំងគ្មានអ្នកណាហ៊ានចេញមុខ បង្ក្រាបនោះទេ។

ជនសង្ស័យ ត្រូវបានកម្លាំងកងរាជអាវុធហត្ថខេត្តបន្ទាយមានជ័យ កំពុងសាកសួរពត៌មានបន្ថែម និងកសាងសំណុំរឿង ដើម្បីចាត់ការបន្តតាមនីតិវិធី។