បន្ទាយមានជ័យៈ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានចុះប្រតិបត្តិការ បង្ក្រាបករណីគ្រឿងញៀនមួយកន្លែងស្ថិតនៅចំណុច ក្នុងម្តុំមាត់អូរព្រំដែនក្នុង ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីវេលាម៉ោង២០ និង០០នាទីយប់ ថ្ងៃទី០១ ខែកញ្ញា ឆ្នាំ២០១៦ ដោយបានធ្វើការឃាត់ខ្លួនជនសង្ស័យម្នាក់ ដែលមានឈ្មោះ ងិក ហ៊ីង ភេទប្រុស អាយុ២៣ឆ្នាំ
មុខរបរមិនពិតប្រាកដ រស់នៅម្តុំមាត់អូរព្រំដែនក្នុង ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ
និងបានចាប់យកវត្ថុតាងមួយចំនួនពីជនសង្ស័យរួមមានៈ
០១. ថ្នាំញៀនប្រភេទម៉ាទឹកកកចំនួន០២កញ្ចប់។
០២.ទូរស័ព្ទចំនួន ០១គ្រឿង
០៣. កាបូបលុយចំនួន០១។

ក្រោយពីឃាត់ខ្លួនជនសង្ស័យរួចមក កម្លាំងកងរាជអាវុធហត្ថបានបញ្ជូនមកបញ្ជាការដ្ឋានខេត្ត ដើម្បីធ្វើការសាកសួរ។ បន្ទាប់ពីធ្វើការសាកសួររួចមក ជនសង្ស័យបានឆ្លើយសារភាពថា រូបគេបានទិញគ្រឿងញៀននេះពីឈ្មោះ រិទ្ធ រុស្សី ភេទប្រុស អាយុ៣០ឆ្នាំ រស់នៅ បណ្តោះអាសន្ន ម្តុំមាត់អូរព្រំដែន ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

ក្រោយពីទទួលបានចម្លើយសារភាពពីជនសង្ស័យហើយនោះ កម្លាំងកងរាជអាវុធហត្ថ ក៏បានចុះទៅឃាត់ខ្លួនជនសង្ស័យម្នាក់នោះភ្លាមៗ បានចាប់យកវត្ថុតាងមួយចំនួនពីជនសង្ស័យរួមមានៈ
០១.ទូរស័ព្ទចំនួន ០១គ្រឿង
០២. កាបូបលុយចំនួន០១។

បើតាមសំដី លោកវរសេនីយ៍ត្រី ជា ដា មេបញ្ជការមូលដ្ឋានកងរាជអាវុធហត្ថក្រុងប៉ោប៉ែត បាន អោយដឹងថា ក្រោយពីឃាត់ខ្លួនជនសង្ស័យទី២ និងបានធ្វើការសាកសួររួចមក ជនសង្ស័យបានសារភាពថា រូបគេបានទិញថ្នាំញៀនទាំងអស់នោះពីមនុស្សស្រីម្នាក់ ដែលមានរយះពេលជិតកន្លះឆ្នាំមកហើយ ដែលក្នុងតម្លៃ១៤០.០០០រៀលក្នុង០១កញ្ចប់។

ជនសង្ស័យ ត្រូវបានកម្លាំងកងរាជអាវុធហត្ថខេត្តបន្ទាយមានជ័យ កំពុងសាកសួរពត៌មានបន្ថែម និងកសាងសំណុំរឿង ដើម្បីចាត់ការបន្តតាមនីតិវិធី។