បន្ទាយមានជ័យៈ នៅវេលាម៉ោង១និង៣០នាទី រំលងអាធ្រាត ថ្ងៃទី២៣ ខែកញ្ញា ឆ្នាំ២០១៦ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានចុះល្បាតក្នុងភូមិសាស្រ្តក្រុង ចំណុចមុខកាស៊ីណូហ្គូលដិន ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដោយធ្វើការឃាត់ខ្លួនជនសង្ស័យចំនួន០២នាក់ សង្ស័យជាប់ពាក់ព័ន្ធជាមួយសារធាតុញៀន។ លោកវរ:សេនីយ៍ត្រី ជា ដា
មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានអោយដឹងថា ដោយមានការសង្ស័យទៅលើយុវជន២នាក់ដែលកំពុងអង្គុយលាក់លៀម នៅមុខកាស៊ីណូ ទើបកម្លាំងអាវុធហត្ថសុំធ្វើការត្រួតពិនិត្យ។ លោកវរ:សេនីយ៍ត្រី ជា ដា បានអោយដឹងទៀតថា ពេលដែលកម្លាំងចុះទៅ ស្រាប់តែជនសង្ស័យបានបោះថ្នាំញៀនចោល ដោយឃើញហេតុការណ៍ដូច្នេះ ទើបកម្លាំងអាវុធហត្ថធ្វើការឃាត់ខ្លួនជនសង្ស័យនោះតែម្ដង និងដកហូតវត្ថុតាងថ្នាំញៀនប្រភេទយ៉ាម៉ាចំនួន០៥គ្រាប់ ហើយបានបញ្ជូនមកបញ្ជាការដ្ឋានកងរាជអាវុធហត្ថខេត្ត ដើម្បីសាកសួរ។ លោកវរ:សេនីយ៍ឯក ស ប៊ុនសឿង មេបញ្ជាការរងកងរាអាវុធហត្ថខេត្តបន្ទាយមានជ័យ បានអោយដឹងថា ជនសង្ស័យដែលត្រូវកម្លាំងកងរាជអាវុធហត្ថធ្វើការឃាត់ខ្លួននោះមានឈ្មោះ ៈ
០១. ម៉ុង សុភ័ក្រ ភេទប្រុស អាយុ២២ឆ្នាំ រស់នៅមិនពិតប្រាកដ
០២. ចាន់ វីរ: ភេទប្រុស អាយុ១៩ឆ្នាំ រស់នៅបន្ទប់ជួល ក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរ:សេនីយ៍ឯក បានបន្តអោយដឹងទៀតថា ក្រោយពីសមត្ថកិច្ចជំនាញសាកសួររួចមក ជនសង្ស័យទាំង២នាក់បានឆ្លើយសារភាពថា ពួកគេពិតជាបានទិញថ្នាំញៀនមករក្សាទុកដើម្បីលក់បន្តដល់យុវជនណាដែលចង់ប្រើប្រាស់ពិតប្រាកដមែន។
ជនសង្ស័យ និងវត្ថុតាង ត្រូវបានកម្លាំងមូលដ្ឋានកងរាជអាវុធហត្ថខេត្តបន្ទាយមានជ័យ បានកសាងសំណុំរឿង ដើម្បីបញ្ជូនបន្ត តាមនីតិវិធី។
