ត្បូងឃ្មុំៈ នៅវេលាម៉ោង២៣ និង៣០នាទីយប់ ថ្ងៃទី០៤ ខែតុលា ឆ្នាំ២០១៦ កម្លាំងកងរាជអាវុធហត្ថលើផ្ទៃប្រទេស សហការជាមួយ កម្លាំងកងរាជអាវុធហត្ថខេត្តត្បូងឃ្មុំ បានធ្វើការឃាត់រថយន្តដឹកឈើល្មើសច្បាប់ចំនួន០១គ្រឿង ស្ថិតនៅចំណុចភូមិស្ពានត្បុល ភូមិជង្គុំស្ពាន ឃុំទន្លួង ស្រុកមេមត់ ខេត្តត្បូងឃ្មំ ។

បើតាមប្រភពពត៌មានពីលោក វរសេនីយ៍ទោ អៀង ភារះ មេបញ្ជាការរង និងជានាយសេនាធិការ កងរាជអាវុធហត្ថខេត្តត្បូងឃ្មុំ បានថ្លែងប្រាប់ភ្នាក់ងារ GRK News ឱ្យដឹងថា ក្នុងប្រតិបត្តិការបង្ក្រាបបទល្មើសនោះផងដែរ កម្លាំងកងរាជអាវុធហត្ថបានធ្វើការឃាត់ខ្លួនបានជនល្មើសចំនួន០៧នាក់ និងបានចាប់យកវត្ថុតាងមួយចំនួនរួមមានៈ
០១. រថយន្តប្រភេទស៊ាំយ៉ុង ចំនួន០២គ្រឿង
០២. ឈើចម្រុះ (កកោះ សុក្រម ត្រសេក) ពេញមួយរថយន្ត (មិនទាន់វាស់វែង)។

បច្ចុប្បន្ន ជនសង្ស័យ និងវត្ថុតាង ត្រូវមន្ត្រីជំនាញកងរាជអាវុធហត្ថខេត្តត្បូងឃ្មុំកំពុងចាត់ការតាមនិតិវិធី។