ភ្នំពេញៈ នៅវេលាម៉ោង១៥ និង៣០នាទី ថ្ងៃទី០៥ ខែតុលា ឆ្នាំ២០១៦ កម្លាំងកងរាជអាវុធហត្ថ រាជធានីភ្នំពេញ សហការជាមួយ កម្លាំងមូលដ្ឋានកងរាជអាវុធហត្ថខណ្ឌចំការមន បានធ្វើការឃាត់ខ្លួនជនសង្ស័យចំនួន០៣នាក់ ជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន ស្ថិតនៅចំណុចម្តុំច្រមុះជ្រូកក្បាលថ្នល់ ច្រកឌឿងហែមភូមិ១២ ផ្លូវមុន្នីវង្ស សង្កាត់ទន្លេបាសាក់ ខណ្ឌចំកាមន រាជធានីភ្នំពេញ។

បើតាមប្រភពពត៌មានពី ឯកឧត្តម ឧត្តមសេនីយ៍ឯក រ័ត្ន ស្រៀង មេបញ្ជាការរង កងរាជអាវុធហត្ថលើផ្ទៃប្រទេស និងជា មេបញ្ជាការ កងរាជអាវុធហត្ថរាជធានីភ្នំពេញ បានថ្លែងប្រាប់ភ្នាក់ងារ GRK News ឱ្យដឹងថា ជនសង្ស័យដែលត្រូវកម្លាំងកងរាជអាវុធហត្ថ ធ្វើការឃាត់ខ្លួននោះរួមមានឈ្មោះៈ
០១. សុខ វិសាល អាយុ២០ឆ្នាំ ប្រុស មុខរបរមិនពិតប្រាកដ ស្នាក់នៅផ្ទះលេខ៤០២ ផ្លូវមុន្នីវង្ស សង្កាត់ទន្លេបាសាក់ ខណ្ឌចំកាមន
០២. អៀង សុខឌី អាយុ៣២ឆ្នាំ ភេទប្រុស មុខរបរកម្មកររោងចក្រ ស្នាក់នៅផ្ទះលេខ១៣០៧ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ
០៣. គង់ សុធារ៉ា អាយុ១៦ឆ្នាំ ភេទប្រុស មុខរបរកម្មករសំណង់ ស្នាក់នៅច្រមុះជ្រូកក្បាលថ្នល់ ច្រកឌឿងហែមភូមិ១២ ផ្លូវមុន្នីវង្ស សង្កាត់ទន្លេបាសាក់ ខណ្ឌចំកាមន រាជធានីភ្នំពេញ។

លោកឧត្តមសេនីយ៍ឯក បានបញ្ជាក់ឱ្យដឹងថាទៀតថា ការឃាត់ខ្លួននេះគឺធ្វើឡើងទៅបានដោយមានការ សហការដ៏ល្អរវាង កម្លាំងមូលដ្ឋានកងរាជអាវុធហត្ថ និងកម្លាំងកងរាជអាវុធហត្ថរាជធានីភ្នំពេញ ដែលបានធ្វើការតាមដាននូវសកម្មភាព របស់ជនសង្ស័យខាងលើជាយូរមកហើយ។

លោកឧត្តមសេនីយ៍ឯក បានបញ្ជាក់បន្តអោយដឹងទៀតថា ក្នុងប្រតិបត្តិការនោះផងដែរ កម្លាំងក៏បានធ្វើការចាប់យកវត្ថុតាង មួយចំនួនពីជនសង្ស័យរួមមានៈ
០១. ថ្នាំញៀនប្រភេទម៉ាទឹកកក ចំនួន១១កញ្ចប់
០២. ថង់វេចខ្ចប់គ្រឿងញៀនចំនួន០១កញ្ចប់ធំ
០៣. ម៉ូតូ ចំនួន០២គ្រឿង
០៤. ទូរស័ព្ទ ចំនួន០៣គ្រឿង។

ជនសង្ស័យ និងវត្ថុតាង ត្រូវបានកម្លាំងកងរាជអាវុធហត្ថរាជធានីភ្នំពេញ កំពុងកសាងសំណុំរឿង ដើម្បីចាត់ការបន្តតាមនីតិវិធី។