ក្រចេះ៖ ដោយមានការចង្អុលបង្ហាញពី លោក ឧត្តមសេនីយ៍ សាន្ត ប៊ុនថានមេបញ្ជាការកងរាជអាវុធហត្ថខេត្តក្រចេះ នៅថ្ងៃទី១៧ ខែមីនា ឆ្នាំ ២០២២ វេលាម៉ោង ១៤ និង១០នាទីកម្លាំងមន្ទីរស្រាវជ្រាវ និងបង្រ្កាបបទល្មើស កម្លាំងមូលដ្ឋាន កងរាជអាវុធហត្ថក្រុងក្រចេះ និងកម្លាំងស្នាក់ការ៧០៦ ដឹកនាំដោយ លោក វរសេនីយ៍ត្រី នាង គង់ហ៊ាន ប្រធានមន្ទីរស្រាវជ្រាវ និងបង្រ្កាបបទល្មើស បានចុះបង្ក្រាបករណីជួញដូរគ្រឿងញៀនដោយខុសច្បាប់នៅចំណុចភូមិទូលព្រិច ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ដោយមានការសម្របសម្រួលនីតិវិធីពីព្រះរាជអាជ្ញាអមសាលាដំបូងខេត្តក្រចេះ។

កម្លាំងបានឃាត់ខ្លួនជនសង្ស័យ ១នាក់ ឈ្មោះ ប៉ក់ បូរិទ្ធ ភេទប្រុស អាយុ ៣១ឆ្នាំជនជាតិខ្មែរ មានទីលំនៅភូមិទូលព្រិច ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។

វត្ថុតាងចាប់យករួមមានម្សៅក្រាមពណ៌ស (សង្ស័យជាសារធាតុញៀន) ចំនួន ៦កញ្ចប់(ធំ ១ ,តូច ៥), ទូរស័ព្ទ ១គ្រឿង, កាំភ្លើងកែច្នៃ ៣ដើម, ដែកកេះ ៣, កញ្ឆាក្រៀម មួយកូនថង់តូច, ថង់សំរាប់រំលែកគ្រឿងញៀនមួយចំនួន។

បច្ចុប្បន្នជនសង្ស័យ និងវត្ថុតាងត្រូវបានមន្ត្រីជំនាញកងរាជអាវុធហត្ថខេត្តអនុវត្តតាមនីតិវិធី។