ក្រចេះៈ នៅវេលាម៉ោង១៥ និង៣០នាទីរសៀល ថ្ងៃទី០៩ ខែតុលា ឆ្នាំ២០១៦ កម្លាំងកងរាជអាវុធហត្ថលើផ្ទៃប្រទេស សហការជាមួយ កម្លាំងមូលដ្ឋានកងរាជអាវុធហត្ថក្រុងក្រចេះ បានធ្វើការឃាត់រថយន្តដឹកឈើល្មើសច្បាប់ចំនួន០១គ្រឿង ស្ថិតនៅចំណុចភូមិវត្ត សង្កាត់វត្ត ក្រុងក្រចេះ ខេត្តក្រចេះ។
បើតាមប្រភពពត៌មានពី លោក ឧត្តមសេនីយ៍ត្រី សាន្ត ប៊ុនថាន មេបញ្ជាការ កងរាជអាវុធហត្ថខេត្តក្រចេះ បានថ្លែងប្រាប់ភ្នាក់ងារ GRK News ឱ្យដឹងថា ក្នុងប្រតិបត្តិការបង្ក្រាបនោះផងដែរ កម្លាំងកងរាជអាវុធហត្ថបានធ្វើការឃាត់ខ្លួនបានជនល្មើសចំនួន០២នាក់ រួមមានឈ្មោះៈ
០១. អោក សំណាង ភេទប្រុស អាយុ៤០ឆ្នាំ ជាម្ចាស់ឈើ
០២. សំណាង ចិត្រា ភេទប្រុស អាយុ១៨ឆ្នាំ ត្រូវជាកូនរបស់ឈ្មោះ អោក សំណាង។
លោក ឧត្តមសេនីយ៍ត្រី បានបន្តអោយដឹងថា កម្លាំងកងរាជអាវុធហត្ថ ក៏បានចាប់យកវត្ថុតាងមួយចំនួនរួមមានៈ
០១. រថយន្តមា៉ក សាំយ៉ុង ពណ៍ស ចំនួន០១គ្រឿង
០២. ឈើប្រណិតប្រភេទធ្នង់ចំនួន១១ដុំ ស្មើនឹង ០,០៨៨មែ៉ត្រគូប
០៣. ឈើប្រណិតប្រភេទបេង ចំនួន ១៦ដុំ ស្មើនិង ០,១២៨មែ៉ត្រគូប
០៤. ឈើប្រណិតប្រភេទសុក្រម ចំនួន១ដុំ ស្មើនិង ០,១៥៨មែ៉ត្រគូប
០៥. ក្តារស្រឡៅ ចំនួន១១សន្លឹក ស្មើនិង ០,១៣៦មែ៉ត្រគូប
០៦. ក្តារកកោះ ចំនួន២៧សន្លឹក ស្មើនិង ០,៣៥២មែ៉ត្រគូប
០៧. ក្តារឈើទាល ចំនួន០៤សន្លឹក ស្មើនិង ០,០៤៩មែ៉ត្រគូប។
បច្ចុប្បន្ន ជនសង្ស័យ និងវត្ថុតាង ត្រូវមន្ត្រីជំនាញកងរាជអាវុធហត្ថខេត្តក្រចេះ កំពុងចាត់ការបន្តតាមនិតិវិធី។
