កណ្តាល ៖ កាលពីរសៀលថ្ងៃសៅរ៍ ៧រោច ខែចេត្រ ឆ្នាំខាល ចត្វាស័ក ពុទ្ធសករាជ២៥៦៥ ត្រូវនឹងថ្ងៃទី២៣ ខែមេសា ឆ្នាំ២០២២ លោក ឧត្តមសេនីយ៍ត្រី សំ តុលា មេបញ្ជាការ កងរាជអាវុធហត្ថខេត្តកណ្តាល បានដឹកនាំមន្ត្រីអាវុធហត្ថក្រោមឱវាទអញ្ជើញចូលរួមគោរពវិញ្ញាណក្ខន្ធ និងរំលែកទុក្ខជាមួយគ្រួសារសព៖ ១.សពលោក វរសេនីយ៍ត្រី  ជុច សុភា នាយប៉ុស្តិ៍នគរបាលទួលព្រេជ ពិធីប្រារព្ធធ្វើនៅភូមិឈើបួន ឃុំម្កាក់  ស្រុកអង្គស្នួល ២.សពលោក អនុសេនីយ៍ទោ រីម សុផាន់ណា មន្ត្រីផ្នែកគ្រឿងញៀនស្រុកអង្គស្នួល ពិធីប្រារព្ធធ្វើនៅភូមិអង្គស្នួលទី៣ ឃុំពើក ស្រុកអង្គស្នួល ខេត្តកណ្តាល ។ ដែលបានពលីជីវិតក្នុងកិច្ចប្រតិបត្តិការបង្ក្រាបបទល្មើសគ្រឿងញៀន តាមដីកាបង្គាប់ឱ្យចាប់ខ្លួន នៅថ្ងៃទី២១ ខែមេសា ឆ្នាំ២០២២ វេលាម៉ោង១២និង១៥នាទី នៅចំណុចភូមិចន្ទ្រាថ្មី ឃុំទួលព្រេជ  ស្រុកអង្គស្នួល ខេត្តកណ្តាល។ នាឱកាសនោះលោក មេបញ្ជាការ កងរាជអាវុធហត្ថខេត្ត និងប្រតិភូអមដំណើរ ក៏បាននាំយកបច្ច័យមួយចំនួនចូលរួមបុណ្យដល់គ្រួសារសពផងដែរ។