អហ បាត់ដំបង៖ នៅវេលាម៉ោង១២និង២០នាទី ថ្ងៃទី៣ ខែកញ្ញា ឆ្នាំ២០១៥ ចំណុចផ្សារមោងថ្មីភូមិកន្សៃបន្ទាយ ឃុំមោងឫស្សី ស្រុកមោងឫស្សី ខេត្តបាត់ដំបង កម្លាំងអាវុធហត្ថស្រុក សហការជាមួយការិយាល័យជំនាញបានប្រើវិធានញុះញង់។ លទ្ធផលឃាត់ជនសង្ស័យ០១នាក់ឈ្មោះ លី ស៊ាន ភេទប្រុស អាយុ១៩ឆ្នាំ មុខរបរជាងជួសជុលទូរស័ព្ទ ទីលំនៅភូមិមោង ឃុំមោង ស្រុកមោង ខេត្តបាត់ដំបង។ ចាប់យកម្សៅក្រាមពណ៌សថ្លាចំនួន១៣កញ្ចប់ ទម្ងន់៣,៧៨ក្រាម, ទូរស័ព្ទ០១គ្រឿង និងម៉ូតូស្កុបពី០១គ្រឿង។ បន្ទាប់មកយើងបានឱ្យជនសង្ស័យធ្វើការអូសទាញបក្ខពួកបន្តរហូតដល់ម៉ោង១៧:៣០នាទី ថ្ងៃដដែល ត្រង់ភូមិគារ3 ឃុំគារ ស្រុកមោង បានឃាត់ខ្លួន០១នាក់ទៀតឈ្មោះ ប៉ែត វាសនា ភេទស្រី អាយុ២៥ឆ្នាំ មុខរបរគ្មាន ទីលំនៅភូមិព្រៃឪម៉ាល់ សង្កាត់រលាប ក្រុងពោធិសាត់ ខេត្តពោធិសាត់។ ចាប់យកម៉ាទឹកកក០១កញ្ចប់ទម្ងន់១,៤០ក្រាម និងទូរស័ព្ទដៃ០១គ្រឿង។ លុះដល់វេលាម៉ោង២០និង១០នាទី ថ្ងៃដដែលកម្លាំងអាវុធហត្ថបានបង្ក្រាបការជួញដូរគ្រឿងញៀនមួយកន្លែងទៀត ត្រង់ចំណុចភូមិមោង ឃុំមោង បានឃាត់ខ្លួនជនសង្ស័យ០១នាក់ឈ្មោះ រ៉ន នី ភេទប្រុស អាយុ១៨ឆ្នាំ មុខរបរគ្មាន ទីលំនៅភូមិរ៉ា ឃុំមោង ស្រុកមោង។ ចាប់យកម៉ាទឹកកក ០៤កញ្ចប់តូច ទម្ងន់១,២៤ក្រាម, ទូរស័ព្ទ០២គ្រឿង និងម៉ូតូ០១គ្រឿង។