ក្រចេះៈ នៅវេលាម៉ោង១៨ និង០០នាទីល្ងាច ថ្ងៃទី១៥ ខែតុលា ឆ្នាំ២០១៦ កម្លាំងកងរាជអាវុធហត្ថលើផ្ទៃប្រទេស សហការជាមួយ កម្លាំងមូលដ្ឋានកងរាជអាវុធហត្ថស្រុកស្នួល បានធ្វើការឃាត់រថយន្តដឹកឈើល្មើសច្បាប់ចំនួន០១គ្រឿង ស្ថិតនៅចំណុច ភូមិមានជ័យ ឃុំស្រែចារ ស្រុកស្នួល ខេត្តក្រចេះ។

នេះបើយោងតាមប្រភពពត៌មានពី លោក ឧត្តមសេនីយ៍ត្រី សាន្ត ប៊ុនថាន មេបញ្ជាការ កងរាជអាវុធហត្ថខេត្តក្រចេះ បានថ្លែងប្រាប់ភ្នាក់ងារ GRK News ឱ្យដឹងថា ក្នុងប្រតិបត្តិការបង្ក្រាបនោះផងដែរ
កម្លាំងកងរាជអាវុធហត្ថ ក៏បានធ្វើការឃាត់ខ្លួនបានជនល្មើសចំនួន០២នាក់ រួមមានឈ្មោះៈ
០១. ម៉ុន វ៉ាន ភេទប្រុស អាយុ៤៦ឆ្នាំ មុខរបរ មន្រ្តីពន្ធធនាគារ ខេត្តក្រចេះ រស់នៅភូមិដូនជ្រាំ សង្កាត់ក្រចេះ ក្រុងក្រចេះ ខេត្តក្រចេះ
០២. គិត ម៉េត ភេទប្រុស អាយុ៤១ឆ្នាំ មុខរបរ រត់ម៉ូតូកង់បី រស់នៅភូមិក្រគរ សង្កាត់ក្រគរ ក្រុងក្រចេះ ខេត្តក្រចេះ។
បន្ថែមពីនោះដែរ លោកឧត្តមសេនីយ៍ត្រី បានបញ្ជាក់ទៀតថា កម្លាំងកងរាជអាវុធហត្ថ ក៏បានធ្វើការ ចាប់យកវត្ថុតាងមួយចំនួនរួមមានៈ
០១. រថយន្ត ចំនួន០១គ្រឿង ម៉ាកតូយូតា HYASS ពណ៌ ស គ្មានស្លាកលេខ
០២. ឈើប្រណិតប្រភេទ គ្រាក់ និងធ្នង់ ជាច្រើនកំណាត់ (មិនទាន់វាស់វែង)។

ជនសង្ស័យ និងវត្ថុតាង ត្រូវមន្ត្រីជំនាញកងរាជអាវុធហត្ថខេត្តក្រចេះ កំពុងកសាងសំណុំរឿង ដើម្បីប្រគល់ជូនខណ្ឌរដ្ឋបាលព្រៃឈើ ចាត់ការបន្តតាមនិតិវិធី។