បន្ទាយមានជ័យៈ កម្លាំងមូលដ្ឋានអាវុធហត្ថក្រុងប៉ោយប៉ែត បានធ្វើការចុះបង្ក្រាប និងឃាត់ខ្លួនជនសង្ស័យបានចំនួន០២នាក់ និងចាប់យកវត្ថុតាងប្រភេទម៉ាទឹកកកចំនួន០១ថង់ នៅវេលាម៉ោង១២ថ្ងៃត្រង់ ថ្ងៃទី១៦ ខែតុលា ឆ្នាំ២០១៦
ស្ថិតនៅចំណុចលើផ្លូវលំម្តុំខាងកើតផ្ទះសំណាក់ គង់ ហាប់ ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្រោយពីឃាត់ខ្លួនហើយ ជនសង្ស័យទាំង២នាក់ត្រូវបានបញ្ជូនមកបញ្ជាការដ្ឋានកងរាជអាវុធហត្ថខេត្តដើម្បីធ្វើការសាកសួរ។
លោកវរៈសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលលើការងារបទល្មើសគ្រឿងញៀន បានប្រាប់អោយដឹងថា ជនសង្ស័យដែលត្រូវកម្លាំងកងរាជអាវុធហត្ថធ្វើការឃាត់ខ្លួននោះមានឈ្មោះៈ
១. ផល សុប៊ុណ្ណាលី ភេទប្រុស អាយុ៤០ឆ្នាំ
២. ដូង ឈុនលេង ភេទប្រុស អាយុ២៦ឆ្នាំ អ្នកទាំង២រស់នៅ ក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរ:សេនីយ៍ឯក ស ប៊ុនសឿង បានបញ្ជាក់ទៀតថា ការឃាត់ខ្លួនជនសង្ស័យទាំង២នាក់នេះបានដោយសារតែបានទទួលព័ត៌មានពីប្រជាពលរដ្ឋនៅក្បែរនោះ។ នៅមុខអាវុធហត្ថខេត្ត ជនសង្ស័យទាំង២នាក់បានឆ្លើយសារភាពថា ពួកគេពិតជាបានជួញដូរគ្រឿងញៀននេះពិតប្រាកដមែន។
លោកវរ:សេនីយ៍ឯក ស ប៊ុនសឿង បានបញ្ជាក់ទៀតថា ក្រោយពីបានចម្លើយសារភាពរបស់ជនសង្ស័យទាំង២រួចមក កម្លាំងអាវុធហត្ថជំនាញបានកសាងសំណុំរឿងបញ្ជូនទៅតុលាការ ដើម្បីចាត់ការបន្តតាមនីតិវិធី។