កំពង់ចាម៖ នៅវេលាម៉ោង ១៤ និង ០០នាទី ថ្ងៃទី១៧ ខែកក្កដា ឆ្នាំ២០២២ កម្លាំងជំនាញអាវុធហត្ថខេត្តកំពង់ចាម បានទទួលបានព័ត៌មានពីប្រជាពលរដ្ឋ ថាមានមុខសញ្ញាប្រើប្រាស់គ្រឿងញៀនកំពុងប្រមូលផ្ដុំគ្នាប្រព្រឹត្តសកម្មភាពនៅចំណុចផ្ទះសំណាក់ យីហោ៣៣ ស្ថិតនៅភូមិទី១ សង្កាត់វាលវង់ ក្រុងកំពង់ចាម ខេត្តកំពង់ចាម។

ដោយបានទទួលបទបញ្ជាពីលោក ឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាម វេលាម៉ោង ១៤:៣០នាទីកម្លាំងជំនាញដឹកនាំដោយលោក វរសេនីយ៍ទោ សែម ឃាង ប្រធានមន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្តកំពង់ចាម បានចុះបង្ក្រាបករណីប្រើប្រាស់ដោយខុសច្បាប់នូវសារធាតុញៀននៅចំណុចផ្ទះសំណាក់យីហោ៣៣ ស្ថិតក្នុងភូមិទី១ សង្កាត់វាលវង់ ក្រុងកំពង់ចាម ខេត្តកំពង់ចាម ដោយមានការសម្របសម្រួលនិងដឹកនាំផ្ទាល់ដោយលោក សុធា ពិសិដ្ឋ ព្រះរាជអាជ្ញារងអមសាលាដំបូងខេត្តកំពង់ចាម។

លទ្ធផលកម្លាំងបានឃាត់ខ្លួនជនសង្ស័យបានចំនួន០២នាក់ និង ចាប់យកវត្ថុតាងទូរស័ព្ទដៃចំនួន០២គ្រឿង, សម្ភារៈប្រើប្រាស់គ្រឿងញៀនមួយចំនួន។

បច្ចុប្បន្នជនសង្ស័យ និង វត្ថុតាងខាងលើ ត្រូវបានមន្ត្រីជំនាញកងរាជអាវុធហត្ថខេត្តកំពង់ចាមចាត់ការតាមនីតិវិធី។