ក្រចេះៈ ឈើល្មើសច្បាប់ជាច្រើនដុំ ដែលជនល្មើសយកមកទំលាក់ចោល ត្រូវបានកម្លាំងកងរាជអាវុធហត្ថលើផ្ទៃប្រទេស សហការជាមួយកម្លាំងមូលដ្ឋានកងរាជអាវុធហត្ថស្រុកស្នួល បានធ្វើការរុករកឃើញ នៅវេលាម៉ោង០៨ និង៣៥នាទីព្រឹក ថ្ងៃទី៣១ ខែតុលា ឆ្នាំ២០១៦ ស្ថិតនៅចំណុចភូមិជ្រោះជ្រៅ ឃុំ២ធ្នូ ស្រុកស្នួល ខេត្តក្រចេះ។
នេះបើតាមការអោយដឹងពី លោកឧត្តមសេនីយ៍ត្រី សាន្ត ប៊ុនថា មេបញ្ជាការ កងរាជអាវុធហត្ថខេត្តក្រចេះ បានប្រាប់ភ្នាក់ងារ GRK News ឱ្យដឹងថា ក្នុងប្រតិបត្តិការបង្ក្រាបបទល្មើសនោះផងដែរ កម្លាំងក៏បានរកឃើញឈើប្រណិតល្មើសច្បាប់ប្រភេទកកោះចំនួន៥១ដុំ ដែលឈ្មួញបានយកមកទំលាក់ចោលនៅក្នុងផ្ទះប្រជាពលរដ្ឋតាមដងផ្លូវចូលទៅច្រកកាបី ព្រំដែនវៀតណាម។
វត្ថុតាង ត្រូវមន្ត្រីជំនាញកងរាជអាវុធហត្ថខេត្តក្រចេះ បានកសាងសំណុំរឿង ដើម្បីប្រគល់ជូនខណ្ឌរដ្ឋបាលព្រៃឈើ ចាត់ការបន្តតាមនិតិវិធី។ ចំណែកជនសង្ស័យ ត្រូវបានកម្លាំងកងរាជអាវុធហត្ថកំពុងស្វែងរក ដើម្បីយកមកផ្តន្ទាទោសតាមច្បាប់។