កំពង់ស្ពឺៈ ដោយមានការចង្អុលបង្ហាញ និងណែនាំពីសំណាក់ លោក ឧត្តមសេនីយ៌ត្រី ជូ សារុន មេបញ្ជាការ កងរាជអាវុធហត្ថខេត្តកំពង់ស្ពឺ កម្លាំងមូលដ្ឋានកងរាជអាវុធហត្ថក្រុងច្បារមន បានធ្វើការបង្ក្រាបករណីចែកចាយគ្រឿងញៀនមួយលើកជាករណីស្តែង នៅវេលាម៉ោង០៣ និង១៥នាទីទាបភ្លឺ ថ្ងៃទី០៦ ខែវិច្ឆិកា ឆ្នាំ២០១៦ ស្ថិតនៅចំណុចភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ ។
នេះបើតាមការអោយដឹងពី ភ្នាក់ងារ GRK News ប្រចាំខេត្តកំពង់ស្ពឺ បានអោយដឹងថា ក្នុងប្រតិបត្តិការបង្ក្រាបនោះផងដែរ កម្លាំងកងរាជអាវុធហត្ថ បានធ្វើការឃាត់ខ្លួនបានជនសង្ស័យម្នាក់ មានឈ្មោះ ហៃ តុលា ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅភូមិថ្មី
សង្កាត់រកាធំ ក្រុងច្បារមន ខេត្តកំពង់ស្ពឺ ដោយធ្វើការចាប់យកបានវត្ថុតាងបានមួយចំនួនរួមមាន ៖
០១.ថ្នាំញៀនប្រភេទម៉ាទឹកកក ចំនួន០៣កញ្ចប់
០២.ម៉ូតូ ចំនួន០១គ្រឿង
០៣. ទូរសព្ទ័ដៃ ចំនួន០២គ្រឿង។
ភ្នាក់ងារបានបញ្ចាក់អោយដឹងទៀតថា នៅមុនពេលកើតហេតុ កម្លាំងកងរាជអាវុធហត្ថក្រុងច្បារមន បានកំពុងចេញបេសកកម្មល្បាត ការពារសុវត្ថិភាព ជូនបងប្អូនប្រជាពលរដ្ឋ នៅចំណុចកើតហេតុខាងលើ ស្រាប់តែប្រទះឃើញជនសង្ស័យខាងលើ បំរុងធ្វើសកម្មភាព ចែកចាយគ្រឿងញៀន ពេលនោះជនសង្ស័យបានប្រទះឃើញកម្លាំងកងរាជអាវុធហត្ថ ក៏មានសភាពភិតភ័យ ក៏បានជិះម៉ូតូគេចខ្លួន តែសំណាងមិនល្អក៏ត្រូវកម្លាំងកងរាជអាវុថហត្ថធ្វើការឃាត់ខ្លួនបាន។
ជនសង្ស័យ និងវត្ថុតាង ត្រូវបានកម្លាំងមូលដ្ឋានកងរាជអាវុធហត្ថក្រុងច្បារមន បានកសាងសំណុំរឿង បញ្ជូនទៅបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តនីតិវិធី ។
(អត្ថបទៈ ម៉ាន់ ដាវីត)
