បន្ទាយមានជ័យៈ ជនសង្ស័យម្នាក់បានប្រើដាវសាម៉ូរ៉ៃកាប់ទៅលើភាគីម្ខាងទៀត អោយរងរបួសជាទម្ងន់ ត្រូវបានកម្លាំងអាវុធហត្ថក្រុងប៉ោយប៉ែតធ្វើការឃាត់ខ្លួន នៅវេលាម៉ោង៦ទាបភ្លឺ ថ្ងៃទី១៤ ខែវិច្ឆិកា ឆ្នាំ២០១៦ ស្ថិតនៅចំណុចការដ្ឋានសាងសង់កាសីុណូផ្កាយ៥ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

ក្រោយពីឃាត់ខ្លួនបានហើយ ជនសង្ស័យត្រូវបានកម្លាំងអាវុធហត្ថក្រុងប៉ោយប៉ែត បញ្ជូនមក បញ្ជាការដ្ឋានកងរាជអាវុធហត្ថខេត្ត ដើម្បីធ្វើការសាកសួរបន្ត។

លោកវរៈសេនីយ៍ត្រី ព្រហ្ម ថេង ប្រធានមន្ទីរយុត្តិធម៌ បានអោយដឹងថា យោងតាមពាក្យបណ្តឹងរបស់ប្រពន្ធជនរងគ្រោះឈ្មោះឌឿន ដាវី ស្នាក់នៅក្នុងការដ្ឋានសាងសង់កាសីុណូផ្កាយប្រាំ បានធ្វើការប្តឹងឈ្មោះ យីប សុនិត ភេទប្រុស អាយុ២៥ឆ្នាំ រស់នៅបណ្តោះអាសន្នក្នុងការដ្ឋានសាងសង់កាសីុណូផ្កាយប្រាំ ចោទប្រកាន់ពីបទប្រើអំពើហិង្សាយកដាវសាម៉ូរ៉ៃកាប់ទៅលើប្តីរបស់ខ្លួនឈ្មោះ លន់ លីស អាយុ៤១ឆ្នាំ មួយកាំបិតចំត្រង់ត្រចៀកខាងឆ្វេងបណ្ដាលអោយរបួសធ្ងន់។

លោកវរៈសេនីយ៍ត្រី ព្រហ្ម ថេង បានអោយដឹងទៀតថា ក្រោយពីសមត្ថកិច្ចអាវុធហត្ថសួរចម្លើយរួចមក ជនសង្ស័យបានឆ្លើយសារភាពថា ខ្លួនគេពិតជាបានយកដាវសាម៉ូរ៉ៃកាប់ទៅលើជនរងគ្រោះចំនួន១កាំបិត ដូចការប្ដឹងចោទប្រកាន់របស់ប្រពន្ធជនរងគ្រោះពិតប្រាកដមែន ដោយសារខ្លួនស្អប់ និងកន្លងមកធ្លាប់មានរឿងជំលោះជាមួយគ្នា។
បច្ចុប្បន្នជនសង្ស័យត្រូវបានកម្លាំងអាវុធហត្ថកំពុងកសាងសំណុំរឿង ដើម្បីចាត់ការបន្តតាមនីតិវិធី។

(អត្ថបទ ឡាក់ ភី)