រាជធានីភ្នំពេញៈ ទីបំផុតកម្លាំងកងរាជអាវុធហត្ថបានចាប់ខ្លួនឃាតក ដែលសម្លាប់ស្ត្រីវ័យក្មេងជាបុគ្គលិកក្លិប៥៥ យកសពទម្លាក់ចោលក្នុងគំនរសំរាម និងបានលាតត្រដាងអាថ៌កំបាំង ដែលឃាតកហ៊ានសម្លាប់នារីរងគ្រោះ។
បើតាមការអោយដឹងពីមន្ត្រី អាវុធហត្ថរាជធានីភ្នំពេញ បានរៀបរាប់ប្រាប់ភ្នាក់ងារ GRK News អោយដឹងថា កាលពីថ្ងៃទី១៦ ខែវិច្ឆិកា ឆ្នាំ២០១៦ មានករណីប្រជាពលរដ្ឋប្រទះឃើញសពនារីម្នាក់ ត្រូវបានគេសម្លាប់យកទៅផ្លុងចោល ក្នុងគំនរសំរាម តាមបណ្ដោយផ្លូវ១០០៣ ស្ថិតនៅភូមិទំនប់សង្កាត់ភ្នំពេញថ្មីខណ្ឌសែនសុខ រាជធានីភ្នំពេញ។

បន្ទាប់ពីទទួលបានព័ត៌មានអាវុធហត្ថខណ្ឌសែនសុខ និងកម្លាំងជំនាញអាវុធហត្ថរាជធានីភ្នំពេញ សហការជាមួយការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលរាជធានីភ្នំពេញ បានធ្វើការស្រាវជ្រាវស្គាល់ អត្តសញ្ញាណជនរងគ្រោះ ឈ្មោះ កែវ កញ្ញា ភេទស្រី អាយុ១៩ឆ្នាំ មុខរបរបុគ្គលិកក្លិប៥៥ ស្នាក់នៅភូមិតានូ សង្កាត់ចាក់អង្រែរក្រោម ខណ្ឌមានជយ័។
បន្ទាប់មកអាវុធហត្ថរាជធានីភ្នំពេញ បានធ្វើការស្រាវជ្រាវតាមដានជាបន្តបន្ទាប់ពីកន្លែងមួយទៅកន្លែងមួយ រហូតដល់ស្រុកកោះធំខេត្តកណ្តាល ទើបចាប់ឃាតកបាន ដោយមានការសហការជាមួយ កម្លាំងអាវុធហត្ថខេត្តកណ្តាល។

នេះបើតាមចម្លើយសារភាពរបស់ឃាតក ឈ្មោះ យ៉េន សុបញ្ញា អាយុ២០ឆ្នាំ មុខរបរ មិនពិតប្រាកដបានឲ្យដឹងថា ខ្លួននិងនារីរងគ្រោះជាអ្នកស្គាល់គ្នាយូរហើយ នៅរសៀលថ្ងៃទី១៥ ខែវិច្ឆិកា ឆ្នាំ២០១៦ ឃាតកបានខ្ចីសោរផ្ទះមិត្តភក្តិម្នាក់ដែលចាំផ្ទះឲ្យបងប្អូនក្នុងបូរីប៉េងហួត ស្ថិតនៅផ្លូវឧកញ៉ាម៉ុងឬទ្ធី ដោយប្រាប់ថានាំស្រីមកដេក។
បន្ទាប់មកឃាតកបានតេទៅរកជនរងគ្រោះ ឲ្យរកលុយលោះទូរស័ព្ទ អាយហ្វូនខ្លួនយកទៅប្រើ ដោយខ្លួនបានដាក់បញ្ចាំ៣០ដុល្លារ តែមិនមានលុយលោះយកវិញ។
ឃាតកបានឆ្លើយសារភាពបន្តទៀតថា នៅវេលាម៉ោងប្រហែល១៦ និង០០នាទីល្ងាច ជនរងគ្រោះបានចេញពីកន្លែងធ្វើការ ក៏បានទៅជួបឃាតកនៅម្តុំផ្សារឃ្លាំងរំសេវ ហើយឃាតកក៏បានប្រាប់ថា អ្នកទទួលបញ្ចាំឲ្យទៅយកទូរស័ព្ទ នៅផ្ទះឯបុរីប៉េងហួត ផ្លូវឧកញ៉ាម៉ុងឬទ្ធី ពេលនោះជនរងគ្រោះក៏បានជូនឃាតកទៅទីនោះ ពេលទៅដល់ពួកគេបានចូលក្នុងផ្ទះ ហើយឃាតកក៏បានយកខ្សែរភ្លើង រឹតករជនរងគ្រោះសម្លាប់ និងយកខ្សែពួរចងដៃចងជើង បត់ទៅក្រោយ រួចយកភួយមករុំ និងចងខ្សែរពីក្រៅមួយជាន់ទៀត បន្ទាប់មកច្រកចូលក្នុងថង់ធំ រួចលើដាក់លើតួម៉ូតូខាងមុខរបស់ជនរងគ្រោះ ដឹកយកទៅទម្លាក់ចោលនៅគំនរសំរាម ក្នុងភូមិសាស្ត្រខាងលើ។

លុះម៉ោងប្រហែលជិត ១៨ និង០០នាទីល្ងាច បន្ទាប់មកឃាតករ បានយកម៉ូតូជនរងគ្រោះទៅបញ្ចាំ ហើយបានដើរលេងជក់ថ្នាំជាមួយមិត្តភក្តិពេញមួយយប់មួយថ្ងៃ ទើបទៅសម្រាកនៅផ្ទះជីដូន នៅផ្លូវវេងស្រេងមួយយប់។

លុះព្រឹកឡើងថ្ងៃទី១៧ ខែវិច្ឆិកា ឆ្នាំ២០១៦ ឃាតកនៅមិនសុខ ខ្លាចសមត្ថកិច្ចចាប់បានក៏គេចខ្លួន ទៅផ្ទះជីដូនខាងឳពុកចុងម្នាក់ទៀត នៅស្រុកកោះធំ ខេត្តកណ្តាល តែត្រូវបានកម្លាំងអាវុធហត្ថរាជធានីភ្នំពេញ ស្រាវជ្រាវតាមទៅចាប់បាននៅទីនោះតែម្តង។

មន្ត្រីអាវុធហត្ថរាជធានីភ្នំពេញ បានបញ្ជាក់បន្តទៀតថា ឃាតកបានឆ្លើយសារភាព ដោយក្លាហានបន្ថែមថា ដោយសារកន្លងមកខ្លួន ជំពាក់លុយគេ២០០ដុល្លារផង និងដោយសារប្រើប្រាស់គ្រឿងញៀនជាប់ជាប្រចាំផង ទើបធ្វើឲ្យខ្លួនគិតអីមិនចេញ ក៏ដាច់ចិត្តសម្លាប់ជនរងគ្រោះ ដើម្បីប្លន់យកទ្រព្យសម្បត្តិយ៉ាងដូច្នេះតែម្តងទៅ៕