ត្បូងឃ្មុំ៖ មានករណីលេងល្បែងស៊ីសង និងបើកកន្លែងលេងល្បែងស៊ីសង កាន់កាប់ល្បែងស៊ីសង ចាត់ចែង និងភ្នាក់ងារស៊ីសង (សង្វៀនជល់មាន់ និងអាប៉ោង) នៅចំណុចកាស៊ីណូហ្រ្គេនហ្គោលដេន ស្ថិតក្នុងភូមិត្រពាំងផ្លុង១ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ដោយអនុវត្តគោលនយោបាយរបស់រាជរដ្ឋាភិបាល ភូមិ ឃុំ មានសុវត្ថិភាព និងមានការចង្អុរបង្ហាញពី លោក នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស ក្រោមការដឹកនាំ បញ្ជាផ្ទាល់ លោក ឧត្តមសេនីយ៍ត្រី រ័ត្ន ចាន់ណា មេបញ្ជាការ កងរាជអាវុធហត្ថខេត្តត្បូងឃ្មុំ និងដោយមានការសម្របសម្រួលពីលោក សូ សុវិទ្យា ព្រះរាជអាជ្ញារង នៃអយ្យការអមសាលាដំបូងខេត្តត្បូងឃ្មុំ  នៅវេលាម៉ោង១២:៥០នាទី  ថ្ងៃទី០៥ ខែកុម្ភៈ ឆ្នាំ២០២៣ លោក វរសេនីយ៍ឯក ថេង ឆេងលីម មេបញ្ជាការរង កងរាជអាវុធហត្ថខេត្ត បានដឹកនាំកម្លាំងចុះរបង្រ្កាប ដោយបានឃាត់ខ្លួនជនសង្ស័យ ចំនួន ០៣នាក់ (មេខ្លោង)។

ឈ្មោះ ហួត ហាន ភេទប្រុស អាយុ ៤៧ឆ្នាំ រស់នៅភូមិពន្លាក ឃុំចុងជាច ស្រុកតំបែរ ខេត្តត្បូងឃ្មុំ, ឈ្មោះ ង៉ូ គានឡុង ភេទប្រុស អាយុ ៣៧ឆ្នាំ រស់នៅភូមិជីមាន់កណ្តាល ឃុំក្រែក ស្រុកពញាក្រែក ខេត្តត្បូងឃ្មុំ, ឈ្មោះ វ៉េត ជីម៉េង ភេទប្រុស អាយុ ៤១ឆ្នាំ រស់នៅភូមិតារាជ ឃុំត្រពាំងរាំង ស្រុកជុំគីរី ខេត្តកំពត។

កម្លាំងបានចាប់យកវត្ថុតាងរថយន្ត០៤គ្រឿង, ម៉ូតូ០៩គ្រឿង, មាន់ជល់ចំនួន ៤៥ក្បាល (ងាប់ ៣២ក្បាល), ប្រអប់ចេញរូបភាព យូគី ០១, ហាន់តោ (ខ្លាឃ្លោក) ០១ផ្ទាំង, ចានខ្លាឃ្លោក ០១ គំរប ០១ និងសំភារៈលេងល្បែងជាច្រើនទៀត។

ជនសង្ស័យនិងវត្ថុតាង ជំនាញបានកសាងសំណុំរឿង និងបញ្ជូនទៅសាលាដំបូងខេត្តតាមនីតិវិធី។