បន្ទាយមានជ័យៈ នៅវេលាម៉ោង២១ និង០០នាទីយប់ ថ្ងៃទី២៩ ខែវិច្ឆិកា ឆ្នាំ២០១៦ នៅចំណុចក្នុងវត្តរតនៈម៉ាឡៃ ស្ថិតក្នុងភូមិម៉ាឡៃ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ មានក្មេងស្ទាវចំនួន០២ក្រុម បានយកដបស្រាបៀរដេញវាយគ្នាយ៉ាងសាហាវបណ្តាលអោយរងរបួសធ្ងន់០៣នាក់ ។
លោកវរៈសេនីយ៍ត្រី តាំង សុខហេង មេបញ្ជាការមូលដ្ឋានកងរាជអាវុធហត្ថស្រុកម៉ាឡៃ បានប្រាប់ភ្នាក់ងារGRK News អោយដឹងថា
នៅមុនពេលកើតហេតុនោះនៅក្នុងវត្តរតនៈម៉ាឡៃបានចាក់ធុងបាស់រាំលេងកំសាន្ត មានក្មេង ប្រុស ស្រី បាននាំគ្នារាំលេងកំសាន្តនៅក្នុងកម្មពិធីនោះ។
កំពង់តែរាំលេងស្រាប់តែមានក្មេងទំនើង០១ក្រុមបានកាន់ដបស្រាបៀរម្នាក់០១ រត់សម្រុកចូលមកកន្លែងវង់រាំ ហើយវាយទៅលើក្រុមក្មេង០១ក្រុមទៀត ដែលកំពុងរាំ បណ្តាលអោយរងរបួសធ្ងន់០៣នាក់។
ភ្លាមៗនោះកម្លាំងអាវុធហត្ថស្រុកម៉ាឡៃ បានចុះទៅដល់កន្លែងកើតហេតុភ្លាម រួចបានធ្វើការឃាត់ខ្លួនបានក្មេងទំនើងម្នាក់ ដែលមានឈ្មោះ រុណ សុធា ភេទប្រុស អាយុ២២ឆ្នាំ រស់នៅភូមិវត្តចាស់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។ ចំណែក៦នាក់ទៀតគេចខ្លួនបាត់អស់។
លោកវរ:សេនីយ៍ត្រី តាំង សុខហេង បានបញ្ជាក់អោយដឹងទៀតថា លុះនៅថ្ងៃទី៣០ ខែវិច្ឆិកា ឆ្នាំ២០១៦ កម្លាំងអាវុធហត្ថស្រុកម៉ាឡៃ បានចុះធ្វើការស្រាវជ្រាវមុខសញ្ញាជនសង្ស័យខាងលើឈានដល់ការឃាត់ខ្លួនបានជនសង្ស័យទាំងអស់ចំនួន៦នាក់បន្ថែមទៀត។
ក្រោយពីឃាត់ខ្លួនជនសង្ស័យបានហើយ កម្លាំងអាវុធហត្ថស្រុកម៉ាឡៃ បានបញ្ជូនមកបញ្ជាការដ្ឋានកងរាជអាវុធហត្ថខេត្ត ដើម្បីសាកសួរបន្ត។
លោកវរ:សេនីយ៍ត្រី ព្រហ្ម ថេង ប្រធានមន្ទីរយុត្តិធម៌ បានប្រាប់អោយដឹងថា ជនសង្ស័យទាំង៦នាក់នោះ មានឈ្មោះ១/សែមសីហា(ហៅចិន) ភេទប្រុស អាយុ២៣ឆ្នាំ ២/ឈ្មោះ វង់ ឆេម ភេទប្រុស អាយុ១៨ឆ្នាំ ៣/ឈ្មោះ ប៉ោះ ភារុណ(ហៅវិត) ភេទប្រុស អាយុ២២ឆ្នាំ ទាំង៣នាក់នេះរស់នៅក្នុងភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ ៤/ឈ្មោះ ឆោម សុខេម(ហៅលឹម) ភេទប្រុស អាយុ២២ឆ្នាំ ៥/ឈ្មោះម៉ន ម៉ៃ ភេទប្រុស អាយុ១៧ឆ្នាំ ៦/ឈ្មោះ វី វន្ត ភេទប្រុស អាយុ២៣ឆ្នាំ ទាំង៣នាក់នេះ រស់នៅភូមិវត្តចាស់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។
លោកវរ:សេនីយ៍ត្រី ព្រហ្ម ថេង បានបញ្ជាក់ទៀតថា ក្រុមក្មេងទំនើងខាងលើនេះ ពេលមានកម្មពិធីបុណ្យ និងកម្មវិធីផ្សេងៗនៅក្នុងស្រុកម៉ាឡៃ ពួកគេតែងតែបង្ករឿងវាយតប់គ្នាជាញឹកញាប់មិនខានក្នុងកម្មពិធីណាមួយឡើយ។
បច្ចុប្បន្នជនសង្ស័យទាំង៨នាក់ត្រូវបានកម្លាំងជំនាញ បានកសាងសំណុំរឿងបញ្ជូនទៅតុលាដើម្បីដាក់ទៅតាមផ្លូវច្បាប់។

(អត្ថបទ ឡាក់ ភី)