បាត់ដំបងៈ នៅវេលាម៉ោង១៦ និង០០នាទីល្ងាច ថ្ងៃទី០៣ ខែធ្នូ ឆ្នាំ២០១៦ កម្លាំងមូលដ្ឋានកងរាជអាវុធហត្ថក្រុងបាត់ដំបង បានធ្វើការឃាត់ខ្លួនជនសង្ស័យម្នាក់ ស្ថិតនៅចំណុចក្រុមទី១២ ភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង ជាប់ពាក់ព័ន្ធជាមួយករណីប៉ុនប៉ងមនុស្សឃាត។
នេះបើតាមប្រភពពត៌មានពី ភ្នាក់ងារ GRK News ប្រចាំខេត្តបាត់ដំបង បានឱ្យដឹងថា ជនសង្ស័យដែលត្រូវកម្លាំងកងរាជអាវុធហត្ថធ្វើការឃាត់ខ្លួននោះមានឈ្មោះ សូរ ផាន់ដារ៉ា ហៅ រ៉ា ភេទប្រុស អាយុ៣០ ឆ្នាំ មុខរបរ មិនពិតប្រាកដ រស់នៅក្រុមទី១២ ភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង។
ភ្នាក់ងារដដែល បានបន្តអោយដឹងទៀតថា ការឃាត់ខ្លួនជនសង្ស័យខាងលើនេះ គឺធ្វើឡើងទៅតាមពាក្យបណ្តឹងរបស់ជនរងគ្រោះមានឈ្មោះ គង់ ចន្ធូ ភេទស្រី អាយុ៣៧ ឆ្នាំ រស់នៅក្រុមទី១២ ភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង ដែលបានចោទប្រកាន់ទៅលើជនសង្ស័យខាងលើថាបាន យកកាំបិតវែង ដេញចាក់ខ្លួន រួមជាមួយអ្នកភូមិជាច្រើននាក់ទៀត ប៉ុន្តែមិនបានសម្រេច ដោយមានអ្នកជួយឃាត់ច្រើន។
ភ្នាក់ងារបានបញ្ជាក់អោយដឹងថា ក្នុងនោះដែរកម្លាំងកងរាជអាវុធហត្ថក៏បានចាប់យកវត្ថុតាងរួមមាន កាំបិតវែងចំនួន០១ដើមផងដែរ។
ភ្នាក់ងារបានបន្ថែមអោយដឹងទៀតថា នៅមុខមន្ត្រីកងរាជអាវុធហត្ថ ជនសង្ស័យបានឆ្លើយសារភាពថា រូបគេពិតជាបានធ្វើដូចជាការចោទប្រកាន់ពិតប្រាកដមែន ប៉ុន្តែមិនទាន់បានបញ្ជាក់ពីមូលហេតុពិតប្រាកដឡើយ។
បច្ចុប្បន្នជនសង្ស័យ ត្រូវបានកម្លាំងកងរាជអាវុធហត្ថ កំពុងកសាងសំណុំរឿង ដើម្បីចាត់ការបន្តតាមនីតិវិធី៕
(អត្ថបទៈ ម៉ាន់ ដាវីត)
