ពោធិ៍សាត់ៈ រថយន្តម៉ាក FUSO ពណ៌ស(គ្មានស្លាកលេខ) ត្រូវបានកម្លាំងកងរាជអាវុធហត្ថខេត្តពោធិ៍សាត់ សហការជាមួយកម្លាំងចំរុះ បានធ្វើការឃាត់ទុក នៅវេលាម៉ោង១៤ និង៣០នាទីរសៀល ថ្ងៃទី០៤ ខែធ្នូ ឆ្នាំ២០១៦ ស្ថិតនៅចំណុច ភូមិស្វាយអាត់ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់ ជាប់ពាក់ព័ន្ធជាមួយករណីដឹកជញ្ជូនឈើខុសច្បាប់ ដោយគ្មានការអនុញ្ញាត។
នេះបើតាមការអោយដឹងពីលោក គង់ សុខុម មន្ត្រីកងរាជអាវុធហត្ថខេត្តពោធិ៍សាត់ បានអោយដឹងថា ក្នុងប្រតិបត្តិការបង្ក្រាបបទល្មើសនោះផងដែរ កម្លាំងកងរាជអាវុធហត្ថ ក៏បានចាប់ឈើល្មើសច្បាប់ដែលជនសង្ស័យបានដឹកជញ្ជូនយកទៅលក់នោះរួមមានៈ
០១. ឈើពកម្រះព្រៅភ្នំ ចំនួន ០១ ដុំ ទម្ងន់ ៤០០ គីឡូក្រាម
០២. ឈើអារម្រះព្រៅភ្នំទំហំ ៦០ សម x ៦០ សម ប្រវែង ០៣ ម៉ែត្រ ចំនួន ០១ ដុំ
០៣. ឈើអារគគី ចំនួន ១០ ដុំ
០៤. តុមូលម្រះព្រៅភ្នំ ចំនួន ១។
មន្ត្រីដដែលបានបញ្ជាក់អោយដឹងទៀតថា ក្នុងនោះដែរ កម្លាំងកងរាជអាវុធហត្ថក៏បានឃាត់ខ្លួនបានជនសង្ស័យម្នាក់ដែលជាអ្នកបើកបររថយន្ត មានឈ្មោះ សឿង វណ្ណៈ ភេទប្រុស អាយុ២៧ឆ្នាំ រស់នៅភូមិអូរស្តៅ សង្កាត់ស្វាយអាត់ ក្រុង ពោធិ៍សាត់ ខេត្តពោធិ៍សាត់។
បច្ចុប្បន្នវត្ថុតាង ត្រូវបានមន្ត្រីជំនាញកងរាជអាវុធហត្ថខេត្តពោធិ៍សាត់ កំពុងកសាងសំណុំរឿង ដើម្បីប្រគល់ជូនខណ្ឌរដ្ឋបាលព្រៃឈើ ចាត់ការបន្តតាមនិតិវិធី។
(អត្ថបទ ម៉ាន់ ដាវីត)
