រតនគិរីៈ នៅវេលាម៉ោង១១ និង០០នាទីថ្ងៃត្រង់ ថ្ងៃទី០៨ ខែធ្នូ ឆ្នាំ២០១៦ កម្លាំងមូលដ្ឋានកងរាជអាវុធហត្ថក្រុងបានលុង បានធ្វើការឃាត់ខ្លួនជនសង្ស័យម្នាក់ ស្ថិតនៅចំណុច ផ្ទះសំណាក់ ពន្លឺពេជ្រ ក្នុងភូមិថ្មី សង្កាត់ឡាបានសៀក ក្រុងបានលុង ខេត្តរតនគីរី ជាប់ពាក់ព័ន្ធជាមួយករណីជួញដូរនូវសារធាតុញៀន។

នេះបើតាមប្រភពពត៌មានពីភ្នាក់ងារ GRK News បានឱ្យដឹងថា ជនសង្ស័យដែលត្រូវកម្លាំងកងរាជអាវុធហត្ថធ្វើការឃាត់ខ្លួននោះមានឈ្មោះ ខុន សុវណ្ណ ភេទប្រុស អាយុ១៦ឆ្នាំ ជនជាតិ ខ្មែរ មុខរបរ មិនពិតប្រាកដទីលំនៅ ភូមិថ្មី សង្កាត់ឡាបានសៀក ក្រុងបានលុង ខេត្តរតនគីរី។

ភ្នាក់ងារ បានបន្តអោយដឹងទៀតថា ការឃាត់ខ្លួនជនសង្ស័យខាងលើនេះ គឺធ្វើឡើង ដោយមានសហការដ៏ល្អរវាងម្ចាស់ផ្ទះសំណាក់ខាងលើ បានផ្តល់ដំណឹងមកកាន់កម្លាំងមូលដ្ឋានកងរាជអាវុធហត្ថ សង្ស័យថាមានបុរសម្នាក់ កំពុងសេពគ្រឿងញៀន ទើបអាចឈានទៅដល់ការចាប់ខ្លួនបានជនសង្ស័យខាងលើ។

ភ្នាក់ងារ បានបន្តឱ្យដឹងថាទៀតថា ក្នុងប្រតិបត្តិការបង្ក្រាបនោះផងដែរ កម្លាំងកងរាជអាវុធហត្ថបានធ្វើការចាប់យកវត្ថុតាង មួយចំនួនពីជនសង្ស័យរួមមានៈ
០១. ថ្នាំញៀនប្រភេទម៉ាទឹកកក ចំនួន១កញ្ចប់ធំ ដែលមានទម្ងន់ស្មើ ៣.៤៥ ក្រាម
០២. ម៉ូតូចំនួន ០១គ្រឿង
០៣. ទូរស័ព្ទ ចំនួន០១គ្រឿង
០៤. សម្ភារៈវេចខ្ចប់ និងសេពគ្រឿងញៀនមួយចំនួន។

បច្ចុប្បន្នជនសង្ស័យ និងវត្ថុតាង ត្រូវបានកម្លាំងកងរាជអាវុធហត្ថ បានកសាងសំណុំរឿង ដើម្បីចាត់ការបន្តតាមនីតិវិធី៕

(អត្ថបទៈ ម៉ាន់ ដាវីត)