ភ្នំពេញៈ ជនសង្ស័យ០៥នាក់ ត្រូវបានកម្លាំងកងរាជអាវុធហត្ថរាជធានីភ្នំពេញ សហការជាមួយ កម្លាំងមូលដ្ឋានកងរាជអាវុធហត្ថខណ្ឌច្បារអំពៅ និងខណ្ឌមានជ័យ ធ្វើការឃាត់ខ្លួន នៅវេលាម៉ោង ០៩ និង៣០នាទី ព្រឹកថ្ងៃទី០៨ ខែធ្នូ ឆ្នាំ២០១៦ ស្ថិតនៅចំណុចផ្ទះជួលលេខ១១៦ ភូមិកណ្តាល១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ជាប់ពាក់ព័ន្ធជាមួយករណីប្លន់ មិត្តភ័ក្ត្រខ្លួនឯង កាលពីយប់ថ្ងៃទី០៦ ខែវិច្ឆិកា ឆ្នាំ២០១៦ ស្ថិតនៅចំណុចមុខហាង វេងឆៃយូ ផ្លូវ២៧១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

នេះបើតាមប្រភពពត៌មានពីមន្ត្រីកងរាជអាវុធហត្ថរាជធានីភ្នំពេញ បានប្រាប់ភ្នាក់ងារ GRK News ឱ្យដឹងថា ជនសង្ស័យដែលត្រូវកម្លាំងកងរាជអាវុធហត្ថធ្វើការឃាត់ខ្លួននោះរួមមានឈ្មោះ ៈ
០១. ស រ៉ាឌី ភេទប្រុស អាយុ២៧ឆ្នាំ មុខរបរ និងទីលំនៅពុំពិតប្រាកដ
០២. សំ ឆាលី ភេទប្រុស អាយុ១៦ឆ្នាំ មុខរបរ និងទីលំនៅពុំពិតប្រាកដ
០៣. បូ ពេជ្រ ភេទស្រី អាយុ១៧ឆ្នាំ មុខរបរ និងទីលំនៅពុំពិតប្រាកដ
០៤. ជា ដាវីត ភេទស្រី អាយុ៣៥ឆ្នាំ មុខរបរអ៊ុតសក់ ស្នាក់នៅចំណុចកើតហេតុខាងលើ
០៥. ហ៊ុន នូសានិត ភេទប្រុស អាយុ២៣ឆ្នាំ មុខរបរកម្មករលក់កងឡាន ទីលំនៅម្តុំផ្សាដេប៉ូ។

មន្ត្រីដដែល បានបន្តអោយដឹងទៀតថា នៅមុនពេលកើតហេតុ នៅវេលាម៉ោង ២២ និង០០នាទីយប់ ថ្ងៃទី០៦ ខែវិច្ឆិកា ឆ្នាំ២០១៦ ជនសង្ស័យខាងលើម្នាក់ ក្នុងចំណោម០៥នាក់នោះ បានប្រើល្បិចបោកបញ្ឆោតអោយមិត្តភ័ក្ត្ររបស់ខ្លួនម្នាក់ ដែលជាជនរងគ្រោះ អោយជិះម៉ូតូទៅចាំខ្លួនទៅចំណុចមុខហាង វេងឆៃយូ ផ្លូវ២៧១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ បន្ទាប់មកជនសង្ស័យខាងលើនោះ ក៏បាននាំបក្ខពួកចំនួន០៤នាក់ ទៅភ្ជង់ប្លន់ម៉ូតូរបស់ជនរងគ្រោះខាងលើ ដោយប្រើដាវគំរាម។

មន្ត្រីដដែល បានបញ្ជាក់ឱ្យដឹងទៀតថា ក្នុងប្រតិបត្តិការបង្ក្រាបនោះផងដែរ កម្លាំងកងរាជអាវុធហត្ថបានធ្វើការចាប់យកវត្ថុតាង មួយចំនួនពីជនសង្ស័យរួមមានៈ
០១. ម៉ូតូ ចំនួន០១គ្រឿង
០២. ទូរស័ព្ទដៃ ចំនួន០១គ្រឿង
០៣. កញ្ឆា ចំនួន០១កញ្ចប់
០៤. កន្ត្រៃកាត់ដែក ចំនួន០១
០៥. កាំបិត ចំនួន០៣
០៦. សោរគ្រប់ប្រភេទ និងសម្ភារៈសម្រាប់ប្រើប្រាស់គ្រឿងញៀនមួយចំនួន។

ជនសង្ស័យ និងវត្ថុតាង ត្រូវបានកម្លាំងកងរាជអាវុធហត្ថ កំពុងកសាងសំណុំរឿង ដើម្បីចាត់ការបន្តតាមនីតិវិធី៕

(អត្ថបទៈ ម៉ាន់ ដាវីត)