បាត់ដំបងៈ នៅវេលាម៉ោង ០០ និង៣០នាទី ពាក់កណ្តាលអធ្រាត្រថ្ងៃទី១០ ខែធ្នូ ឆ្នាំ២០១៦ កម្លាំងមូលដ្ឋានកងរាជអាវុធហត្ថស្រុកបាណន់ បានធ្វើការឃាត់ខ្លួនជនសង្ស័យម្នាក់ ស្ថិតនៅចំណុចខាងជើងអាងកំពីងពួយ ភូមិតាង៉ែន ឃុំតាគ្រាម ស្រុកបាណន់ ខេត្តបាត់ដំបង សង្ស័យជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន។

នេះបើតាមប្រភពពត៌មានពីភ្នាក់ងារ GRK News ដែលទទួលបានពីមន្ត្រីកងរាជអាវុធហត្ថ ខេត្តបាត់ដំបង បានឱ្យដឹងថា ជនសង្ស័យដែលត្រូវកម្លាំងកងរាជអាវុធហត្ថ ធ្វើការឃាត់ខ្លួននោះមានឈ្មោះ គឿមបូរ៉ា ភេទប្រុស អាយុ២៣ឆ្នាំ មុខរបរធ្វើស្រែ រស់នៅខាងជើងអាងកំពីងពួយ ភូមិតាង៉ែន ឃុំតាគ្រាម ស្រុកបាណន់ ខេត្តបាត់ដំបង។

ភ្នាក់ងារបានបញ្ជាក់អោយដឹងទៀតថា ការឃាត់ខ្លួនជនសង្ស័យខាងលើនេះ គឺធ្វើឡើងស្របពេលដែលកម្លាំងកងរាជអាវុធហត្ថកំពុងល្បាតការពារសន្តិសុខជូនបងប្អូនប្រជាពលរដ្ឋ នៅចំណុចខាងលើ ស្រាប់តែប្រទះឃើញបុរសខាងលើ ហាក់មានការសង្ស័យ ក៏បានធ្វើការសាកសួរ ក៏ប្រទះឃើញ វត្ថុតាង មួយចំនួន រួមមានៈ
០១. ថ្នាំញៀនប្រភេទម៉ាទឹកកក ចំនួន១០កញ្ចប់
០២. ទូរស័ព្ទ ចំនួន០១គ្រឿង
០៣. ម៉ូតូ ចំនួន០១គ្រឿង។

ជនសង្ស័យ និងវត្ថុតាង ត្រូវបានកម្លាំងកងរាជអាវុធហត្ថ កំពុងកសាងសំណុំរឿង ដើម្បីចាត់ការបន្តតាមនីតិវិធី៕

(អត្ថបទៈ ម៉ាន់ ដាវីត)