បន្ទាយមានជ័យៈ នៅវេលាម៉ោង១៦ និង០០នាទី ថ្ងៃទី២៤ ខែធ្នូ ឆ្នាំ២០១៦ នៅចំណុចសួនស្នេហ៍ជនបទ ស្ថិតក្នុងភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ កម្លាំងជំនាញបទល្មើសគ្រឿងញៀន កងរាជអាវុធហត្ថខេត្តបន្ទាយមានជ័យ បានចុះប្រតិបត្តិការបង្រ្កាបករណីជួញដូរដោយខុសច្បាប់នូវសារធាតុញៀន ០១លើក ដោយឃាត់ខ្លួនជនសង្ស័យជាបន្តបន្ទាប់ចំនួន០៣នាក់។
លោកវរសេនីយ៍ឯក ស ប៊ុនសឿង បានអោយដឹងថា ជនសង្ស័យដែលត្រូវកម្លាំងកងរាជអាវុធហត្ថធ្វើការឃាត់ខ្លួននោះមានឈ្មោះៈ
១/.ឈ្មោះ ផឹម វ៉ាន់នូ ភេទប្រុស អាយុ ២០ឆ្នាំ រស់នៅភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ
២/.ឈ្មោះ ថា ស៊ីថាន ភេទប្រុស អាយុ២៦ឆ្នាំ រស់នៅ ភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ
៣/.ឈ្មោះ នឹម ស្រីល័ក្ខ ភេទស្រី អាយុ៣២ឆ្នាំ រស់នៅបន្ទប់ជួល ភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
លោកវរសេនីយ៍ឯក ស ប៊ុសឿង បានអោយដឹងទៀតថា ក្រោយពីឃាត់ជនសង្ស័យទាំង០៣នាក់ កម្លាំងក៏បានដកហូតបានគ្រឿងញៀនមេតំហ្វេតាមីនទឹកកក ចំនួន០១កូនថង់ ដែលមានទម្ងន់០,៣៩ ក្រាម (សូន្យក្បៀសសាមសិបប្រាំបួន) គ្រឿងញៀនមេតំហ្វេតាមីនគ្រាប់ចំនួន០៥ គ្រាប់(ប្រាំគ្រាប់) ទូរស័ព្ទដៃចំនួន០៦គ្រឿង។
បច្ចុប្បន្ន កម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ចាត់ការតាមផ្លូវច្បាប់។
(អត្ថបទៈ ឡាក់ ភី)
