ព្រះវិហារៈ ស្ត្រីជាជនសង្ស័យម្នាក់ ត្រូវបាន កម្លាំងមូលដ្ឋានកងរាជអាវុធហត្ថស្រុកគូលែន បានធ្វើការឃាត់ខ្លួន នៅវេលាម៉ោង ១២ និង១៥នាទី ថ្ងៃទី២៦ ខែធ្នូ ឆ្នាំ២០១៦ ស្ថិតនៅចំណុច ខ្ទមចំការ ភូមិស្រយង់ជើង ឃុំស្រយង់ ស្រុកគូលែន ខេត្តព្រះវិហារ។

នេះបើតាមការឱ្យដឹងពី ឯកឧត្តម ឧត្តមសេនីយ៍ត្រី កង សៅគុណ មេបញ្ជាការ កងរាជអាវុធហត្ថខេត្តព្រះវិហារ បានឱ្យដឹងថា ជនសង្ស័យដែលត្រូវកម្លាំងកងរាជអាវុធហត្ថ ធ្វើការឃាត់ខ្លួននោះមានឈ្មោះ វ៉ាន់ ម៉ាលីស ភេទស្រី អាយុ២៨ឆ្នាំ មុរបរជា នារីបំរើខារ៉ាអូខេ រស់នៅ ភូមិស្រយង់ជើង ឃុំស្រយង់ ស្រុកគូលែន ខេត្តព្រះវិហារ។

លោកឧត្តមសេនីយ៍ត្រី បានបន្តឱ្យដឹងទៀតថា ស្ត្រីជាជនសង្ស័យខាងលើនេះ គឺជាមុខសញ្ញាចែកចាយគ្រឿងញៀនយ៉ាងសកម្ម ដែលតែងតែចែកចាយគ្រឿងញៀននៅចំណុចកើតហេតុខាងលើ ដែលកម្លាំងកងរាជអាវុធហត្ថ បានកំណត់មុខសញ្ញាជាយូរមកហើយ។

លោកឧត្តមសេនិយ៍ត្រី បានបញ្ជាក់អោយដឹងទៀតថា ក្នុងប្រតិបត្តិការបង្ក្រាបនោះផងដែរ កម្លាំងកងរាជអាវុធហត្ថ ក៏បានចាប់យកវត្ថុតាងមួយចំនួនពីជនសង្ស័យរួមមានៈ
១. ថ្នាំញៀនប្រភេទម៉ាទឹកក ចំនួន០៦កញ្ចប់
២. ដាវសាមួរ៉ៃ ចំនួន០១ដើម
៣. ម៉ូតូ ចំនួន០១គ្រឿង
៤. ស្នាប់ដៃឈើ០១
៥. ទូរស័ព្ទដៃ ចំនួន០៣គ្រឿង។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថព្រះវិហារ បានកសាងសំណុំរឿង ដើម្បីចាត់ការបន្តតាមនីតិវិធី៕

(អត្ថបទៈ ម៉ាន់ ដាវីត)