អហ កណ្តាល៖ នៅវេលាម៉ោង១៩និង០០នាទី ថ្ងៃទី១៥ ខែកញ្ញា ឆ្នាំ២០១៥ នៅចំណុចផ្ទះជនរងគ្រោះ ឈ្មោះ ជួន ពេជ្រ អាយុ៤២ឆ្នាំ មុខរបរ​កសិករ រស់នៅភូមិ/ឃុំគោកត្រប់ ស្រុកកណ្តាលស្ទឹង ខេត្តកណ្តាល មានអំពើហិង្សាមួយកើតឡើងបង្កដោយកូនបង្កើន។ កម្លាំងអាវុធហត្ថបាន​ឃាត់ខ្លួន​ជនសង្ស័យ០១នាក់ឈ្មោះ ពេជ្រ ភារុន ភេទប្រុស អាយុ២២ឆ្នាំ (ជាកូនបង្កើតរបស់ជនរងគ្រោះ) មុខរបរកម្មករសំណង់ រស់នៅភូមិទន្លា ឃុំថ្មី ស្រុកកណ្តាលស្ទឹង ខេត្តកណ្តាល។ កម្លាំងជំនាញបានចាប់យកកាំបិតប៉ាងតោ ០១។ ដំណើររឿង៖ ជនសង្ស័យបានមកកាច់របង ទ្វាររបង និងផ្លោះចូលផ្ទះឪពុកម្តាយរបស់ខ្លួន ដោយកាន់កាំបិតនៅនឹងដៃ ហើយកាប់ទ្រុងគោ កាប់ទ្វារផ្ទះ និងប្រមូលចំបើងដុតទ្វារផ្ទះ ប៉ុន្តែត្រូវបានពន្លត់ទាន់ ហើយជននោះបានដេញកាប់ម្តាយរបស់ខ្លួនទៀត។ ម្តាយរបស់ជនសង្ស័យបានរត់ទៅពួនផ្ទះអ្នកភូមិ រួចបានទូរសព្ទ័ប្តឹងមក​កម្លាំង​​អាវុធហត្ថស្រុកឱ្យ​ជួយ​អន្តរាគមន៍។ កម្លាំងអាវុធហត្ថស្រុកបានចុះដល់កន្លែងកើតហេតុ ធ្វើការនាំជនសង្ស័យយក​មកមូលដ្ឋាន​អាវុធហត្ថ​ស្រុក​តែម្តង។