កំពតៈ អនិតិជនម្នាក់ ត្រូវបាន កម្លាំងមូលដ្ឋានកងរាជអាវុធហត្ថស្រុកកំពង់ត្រាច បានធ្វើការឃាត់ខ្លួន នៅវេលាម៉ោង២៣ និង០០នាទី ថ្ងៃទី០៤ ខែមករា ឆ្នាំ២០១៧ ស្ថិតនៅចំណុចភូមិថ្កូវ ឃុំឫស្សី ស្រុកខាងលិច ស្រុកកំពង់ត្រាច ខេត្តកំពត។

នេះបើតាមការឱ្យដឹងពី មន្ត្រីកងរាជអាវុធហត្ថខេត្តកំពត បានឱ្យដឹងថា ជនសង្ស័យដែលត្រូវកម្លាំងកងរាជអាវុធហត្ថ ធ្វើការឃាត់ខ្លួននោះមានឈ្មោះ ព្រាប ជិន ភេទប្រុស អាយុ១៧ឆ្នាំ មុខរបរ បោកអ៊ុត រស់នៅភូមិភ្នំសាលី ឃុំកំពុងត្រាចខាងលិច ស្រុកកំពង់ត្រាច ខេត្តកំពត។

មន្ត្រីដដែល បានបន្តឱ្យដឹងទៀតថា ក្នុងប្រតិបត្តិការបង្ក្រាបនោះផងដែរ កម្លាំងកងរាជអាវុធហត្ថ ក៏បានចាប់យកវត្ថុតាងមួយចំនួនពីជនសង្ស័យរួមមាន ថ្នាំញៀនប្រភេទម៉ាទឹកក ចំនួន០១កញ្ចប់ ដែលមានទម្ងន់ស្មើ ០.៣០ក្រាម។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្តតាមនីតិវិធី៕

(អត្ថបទ ម៉ាន់ ដាវីត)