អហ ភ្នំពេញ៖ នៅវេលាម៉ោង២២និង១០នាទី ថ្ងៃទី១៧ ខែកញ្ញា ឆ្នាំ២០១៥ ចំណុចផ្លូវមុនីវង្ស សង្កាត់បឹងកេងកង១ ខណ្ឌចំការមន ដោយមានបណ្តឹងផ្ទាល់មាត់ពីជនរងគ្រោះស្តីពីអំពើលួចមានស្ថានទំងន់ (ដាក់ថ្នាំសន្តំយកម៉ូតូ) កាលពីថ្ងៃទី១៦ ខែកញ្ញា ឆ្នាំ២០១៥ នៅសួនច្បារឃ្លាំងសាំងសូគីម៉ិច ផ្លូវជាតិលេខ៥ ខណ្ឌឬស្សីកែវ ទើបកម្លាំងអាវុធហត្ថខណ្ឌបាននាំខ្លួនជនសង្ស័យឈ្មោះ អ៊ឹង កុកឃាង ភេទប្រុស ២៣ឆ្នាំ ស្នាក់នៅផ្ទះជួល ផ្លូវរថភ្លើង ភូមិទួលសង្កែ សង្កាត់ទួលសង្កែ ខណ្ឌឬស្សីកែវ។ ក្រោយពីធ្វើការស្តាប់ចម្លើយចប់កម្លាំង​​​អាវុធហត្ថខណ្ឌចំការមន សហការជាមួយអាវុធហត្ថខណ្ឌឬស្សីកែវ ដឹកនាំដោយលោកនាយការិយាល័យព្រហ្មទណ្ឌ​បានចុះស្រាវជ្រាវ​និង​ឃាត់ខ្លួនស្ត្រីម្នាក់នៅបន្ទប់ជួលដែលជាអ្នកទូរស័ព្ទហៅជនរងគ្រោះយកទៅដាក់ថ្នាំ។ កម្លាំងជំនាញឃាត់ខ្លួនជនសង្ស័យឈ្មោះ ជា ស៊ី ណាង ភេទស្រី អាយុ៣១ឆ្នាំ ស្នាក់នៅបន្ទប់ជួល ផ្លូរទេះភ្លើង ភូមិទួលសង្កែ សង្កាត់ទួលសង្កែ ខណ្ឌឬស្សីកែវ។ ជនរងគ្រោះឈ្មោះ កែវ សារ៉ន ភេទប្រុស អាយុ២៩ឆ្នាំ រត់ម៉ូតូឌុប ស្នាក់នៅបន្ទប់ជួល ផ្លូវលំ សង្កាត់ច្បារអំពៅ ខណ្ឌច្បារអំពៅ។