ត្បូងឃ្មុំ៖ ជនសង្ស័យចំនួន០៨នាក់ និងថ្នាំញៀន១៦កញ្ចប់ ត្រូវបានកម្លាំងកងរាជអាវុធហត្ថខេត្តត្បូងឃ្មុំ បានធ្វើការឃាត់ខ្លួន និងចាប់យកវត្ថុតាងទាំងនោះ ដើម្បីកសាងសំណុំរឿង ផ្តន្ទាទោសទៅតាមផ្លូវច្បាប់។

តាមការថ្លែងឱ្យដឹងពីលោកវរសេនីយ៍ឯក អ៊ាង ភារៈ មេបញ្ជាការរង និងជានាយសេនាធិការ កងរាជអាវុធហត្ថខេត្តត្បូងឃ្មុំ បានឱ្យដឹងថា ក្នុងការឃាត់ខ្លួនជនសង្ស័យទាំង០៨នាក់នោះ គឺធ្វើឡើងជា០៣លើក ដោយប្រតិបត្តិការលើកទី០១ធ្វើឡើងនៅវេលាម៉ោង ១៦ និង៥០នាទី ថ្ងៃទី១២ ខែមករា ឆ្នាំ២០១៧ ស្ថិតនៅចំណុចភូមិល្អក់ ឃុំក្រែក
ស្រុកពញាក្រែក ខេត្តត្បូងឃ្មុំ ដោយឃាត់ខ្លួនបានជនសង្ស័យចំនួន០២នាក់ មានឈ្មោះ ឡាវ វិកទ័រ ភេទប្រុស អាយុ១៦ឆ្នាំ រស់នៅភូមិជីមាន់កណ្តាល ឃុំ/ស្រុកខាងលើ និងឈ្មោះ ច្រឹក ម៉េងទី ភេទប្រុស អាយុ១៦ឆ្នាំ រស់នៅភូមិ/ឃុំជាមួយគ្នា ដោយបានធ្វើការចាប់យកវត្ថុតាងមួយចំនួនពីជនសង្ស័យរួមមានៈ
០១. ថ្នាំញៀនចំនួន០២កញ្ចប់ (ម្សៅក្រាមពណ៌ស)
០២. ម៉ូតូ ០២គ្រឿង ម៉ាកសង់ប៊ិចពណ៌ក្រហម ០១គ្រឿង និងម៉ាកវេ៉វអាល់ហ្វាពណ៌ក្រហម ០១គ្រឿង។

ដោយឡែក ប្រតិបត្តិការលើកទី០២ធ្វើឡើងនៅវេលាម៉ោង ១៥ និង៣០នាទី ថ្ងៃទី១៣ ខែមករា ឆ្នាំ២០១៧ ស្ថិតនៅចំណុចភូមិសុវណ្ណនិគម ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ដោយឃាត់ខ្លួនបានជនសង្ស័យចំនួន០៥នាក់ មានឈ្មោះ
០១. ខន សុខរ៉ាន់ ភេទប្រុស អាយុ២០ឆ្នាំ រស់នៅភូមិ/ឃុំខាងលើ
០២. ខឿន សុណា ភេទប្រុស អាយុ១៨ឆ្នាំ រស់នៅភូមិបុសទី១ ឃុំកក់ ស្រុកពញាក្រែក
០៣. ងីន ចំណាប់ ភេទប្រុស អាយុ២២ឆ្នាំ រស់នៅភូមិ/ឃុំជាមួយគ្នា
០៤. ឃឿន សេងហុង ភេទប្រុស អាយុ២១ឆ្នាំ រស់នៅភូមិព្រែកតានប់ ឃុំដូនតី ស្រុកពញាក្រែក
០៥. ជៀប ជាង ភេទប្រុស អាយុ២០ឆ្នាំ រស់នៅភូមិទួលអង្គញ់ ឃុំ/ស្រុកជាមួយគ្នា និងបានធ្វើការចាប់យកវត្ថុតាងមួយចំនួនពីជនសង្ស័យរួមមានៈ
០១. ថ្នាំញៀនចំនួន០៥កញ្ចប់ (ម្សៅក្រាមពណ៌ស)
០២. ម៉ូតូ ០៣គ្រឿង ម៉ាកអ៊ិចសិនធ័រ ពណ៌ក្រហម ០១គ្រឿង ម៉ាកវេ៉វអាល់ហ្វាពណ៌ខ្មៅ ០១គ្រឿង និងម៉ាកសេ១២៥ពណ៌ខ្មៅ ០១គ្រឿង។

ប្រតិបត្តិការលើកទី០៣ ធ្វើឡើងនៅវេលាម៉ោង ១៣ និង៥០នាទី ថ្ងៃទី១៣ ខែមករា ឆ្នាំ២០១៧ ស្ថិតនៅចំណុចភូមិត្បូងវត្ត ឃុំ/ស្រុកមេមត់ ខេត្តត្បូងឃ្មុំ ដោយឃាត់ខ្លួនបានជនសង្ស័យចំនួន០១នាក់ ឈ្មោះ ចាន់ ដា ភេទស្រី អាយុ៣៧ឆ្នាំ រស់នៅភូមិ/ឃុំខាងលើ និងបានធ្វើការចាប់យកវត្ថុតាងជាថ្នាំញៀនចំនួន០៩កញ្ចប់ (ម្សៅក្រាមពណ៌ស)។

សរុបក្នុងការចេញប្រតិបត្តិការបង្ក្រាបទាំង០៣លើកនេះ កម្លាំងកងរាជអាវុធហត្ថខេត្តត្បូងឃ្មុំ បានធ្វើការឃាត់ខ្លួនបានជនសង្ស័យចំនួន០៨នាក់ និងបានចាប់យកគ្រឿងញៀនចំនួន ១៦កញ្ចប់ ព្រមទាំងវត្ថុតាងពាក់ពន្ធ័មួយចំនួនទៀត។

បច្ចុប្បន្ន ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថខេត្តត្បូងឃ្មុំ កំពុងកសាងសំណុំរឿង ដើម្បីចាត់ការបន្តតាមនីតិវិធី៕