ភ្នំពេញៈ នៅព្រឹកថ្ងៃទី១៥ ខែមករា ឆ្នាំ២០១៧ មន្ត្រីជំនាញ នៃកងរាជអាវុធហត្ថរាជធានីភ្នំពេញ បានបញ្ជូនជនសង្ស័យចំនួន១១នាក់ ពាក់ព័ន្ធជាមួយករណីជួញដូរ និងប្រើប្រាស់គ្រឿងញៀន ទៅសាលាដំបូងរាជធានីភ្នំពេញ ដើម្បីផ្តន្ទាទោសតាមផ្លូវច្បាប់។
ជនសង្ស័យទាំង១១នាក់ខាងលើនេះ ត្រូវបានមន្ត្រីកងរាជអាវុធហត្ថរាជធានីភ្នំពេញ ស្រាវជ្រាវ និងបង្ក្រាបបាន នៅ០៦ទីតាំងផ្សេងៗគ្នាជាបន្តបន្ទាប់ក្នុងរយៈពេល០៣ថ្ងៃ និងដកហូតបានថ្នាំញៀន ជាង១គីឡូក្រាម និងវត្ថុតាងពាក់ព័ន្ធជាមួយគ្រឿងញៀនមួយចំនួនទៀត។
ជនសង្ស័យទាំង១១នាក់នោះ រួមមានៈ
– ជនសង្ស័យទី១ ថុល ថារ៉ា ហៅតឿ ភេទប្រុស អាយុ២៧ឆ្នាំ ត្រូវអាវុធហត្ថរាជធានីភ្នំពេញ ក្នុងខណ្ឌពោធិសែនជ័យ បង្ក្រាបបានកាលពីថ្ងៃទី១២ ខែមករា ឆ្នាំ២០១៧ នៅចំណុចភូមិថ្មគោល ផ្លូវបេតុង សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ។
– ជនសង្ស័យទី២ឈ្មោះ ធឿក ធិន ភេទប្រុស អាយុ២៨ឆ្នាំ និងជនសង្ស័យទី៣ឈ្មោះ អុន ឃ្លី ភេទប្រុស អាយុ៣៧ឆ្នាំ ត្រូវអាវុធហត្ថរាជធានីភ្នំពេញ ក្នុងខណ្ឌព្រែកព្នៅបង្ក្រាបបានកាលពី ថ្ងៃទី១៣ ខែមករា ឆ្នាំ២០១៧ នៅចំណុចលើផ្លូវបេតុងទួលចារ ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
– ជនសង្ស័យទី៤ឈ្មោះ ងួន សុវ៉ាត់ ហៅវ៉ា ភេទប្រុស អាយុ២៩ឆ្នាំ និងជនសង្ស័យទី៥ឈ្មោះ ណុប ចាន់ ហៅរី ភេទប្រុស អាយុ៣៣ឆ្នាំ និងជនសង្ស័យទី៦ឈ្មោះ សាន់ តាយ ភេទប្រុស អាយុ៣២ឆ្នាំ ត្រូវអាវុធហត្ថរាជធានីភ្នំពេញ ក្នុងខណ្ឌ៧មករា បង្ក្រាបបានកាលពីថ្ងៃទី១៣ ខែមករា ឆ្នាំ២០១៧ នៅចំណុចផ្លូវលេខ២១៥ ភូមិលេខ៥ សង្កាត់វាលវង្ស ខណ្ឌ៧មករា និងនៅលើផ្លូវ១០៥ សង្កាត់ព្រលិត ខណ្ឌ៧មករា រាជធានីភ្នំពេញ។
– ជនសង្ស័យទី៧ឈ្មោះ អ៊ីម សារិទ្ធ ភេទប្រុស អាយុ៣១ឆ្នាំ ត្រូវអាវុធហត្ថរាជធានីភ្នំពេញ ក្នុងខណ្ឌ សែនសុខ បង្ក្រាបបានកាលពីថ្ងៃទី១៣ ខែមករា ឆ្នាំ២០១៧ នៅចំណុចដីឡូត៍ ភូមិបាយ៉ាប សង្កាត់ ភ្នំពេញថ្មី ខណ្ឌសែនសុខ រាជធានីភ្នំពេញ។
– ជនសង្ស័យទី៨ឈ្មោះ សុខ ថា ភេទប្រុស អាយុ២៦ឆ្នាំ និងជនសង្ស័យទី៩ឈ្មោះ ហេង ស្រីកា ភេទស្រី អាយុ២៩ឆ្នាំ ត្រូវអាវុធហត្ថរាជធានីភ្នំពេញក្នុងខណ្ឌដូនពេញ បង្ក្រាបបានកាលពីថ្ងៃទី១៤ ខែមករា ឆ្នាំ២០១៧ នៅចំណុចលើផ្លូវលេខ១៥៤ កែងផ្លូវលេខ៥១ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
– ជនសង្ស័យទី១០ឈ្មោះ បាន ទី ភេទប្រុស អាយុ២១ឆ្នាំ និងជនសង្ស័យទី១១ឈ្មោះ ហួត ភារិទ្ធ ហៅញ៉ាញ់ ភេទប្រុស អាយុ១៨ឆ្នាំ ត្រូវអាវុធហត្ថរាជធានីភ្នំពេញ ក្នុងខណ្ឌជ្រោយចង្វារ បង្ក្រាបបាន កាលពីថ្ងៃទី១៤ ខែមករា ឆ្នាំ២០១៧ នៅកំពង់ដរ ភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។

(អត្ថបទៈ សឹម ហាន)