តាកែវៈ នៅវេលាម៉ោង១៣ និង០០នាទី ថ្ងៃទី១៧ ខែមករា ឆ្នាំ២០១៧ កម្លាំងកងរាជអាវុធហត្ថខេត្តតាកែវ និងដោយមានការសម្របសម្រួល ពីព្រះរាជអាជ្ញាអមសាលាដំបូងខេត្ត បានធ្វើការឃាត់ខ្លួន ជនសង្ស័យចំនួនម្នាក់ ស្ថិតនៅចំណុចភូមិព្រៃធំ ឃំុព្រះបាទជាន់ជំុ ស្រុកគីរីវង់ ខេត្តតាកែវ សង្ស័យជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន។

នេះបើតាមការឱ្យដឹងពី មន្ត្រីកងរាជអាវុធហត្ថខេត្តតាកែវ បានប្រាប់ភ្នាក់ងារ GRK News ឱ្យដឹងថា ជនសង្ស័យដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះមានឈ្មោះ សេង ង៉ែត ភេទប្រុស អាយុ២៧ឆ្នាំ មុខរបរមិនពិតប្រាកដ រស់នៅភូមិព្រៃធំ ឃំុព្រះបាទជាន់ជំុ ស្រុកគីរីវង់ ខេត្តតាកែវ។

មន្ត្រីដដែល បានបញ្ជាក់ឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានចាប់យកវត្ថុតាងមួយចំនួនពីជនសង្ស័យរួមមានៈ
១. ថ្នាំញៀនប្រភេទម៉ាទឹកកក ចំនួន០៧កញ្ចប់ ដែលមានទម្ងន់ ២៥.៥០ក្រាម
២. ជញ្ជីងថ្លឹង ចំនួន០១គ្រឿង
៣. កាំភ្លើងឆ្នៃ ចំនួន០១ដើម
៤. ប្រដាប់ឆក់ត្រី ០១កំប្លេ
៥. ដាវដែក ចំនួន០១ដើម និងឧបករណ៍សម្រាប់វេចខ្ចប់គ្រឿងញៀនមួយចំនួន។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្តតាមនីតិវិធី៕

(អត្ថបទ ម៉ាន់ ដាវីត)