ស្វាយរៀងៈ នៅវេលាម៉ោង០៧ និង៣៥នាទី ព្រឹកថ្ងៃទី២០ ខែមករា ឆ្នាំ២០១៧ កម្លាំងកងរាជអាវុធហត្ថក្រុងបាវិត បានធ្វើការឃាត់ខ្លួន ជនសង្ស័យចំនួន០៣នាក់ ស្ថិតនៅចំណុចផ្ទះទុកចោលមួយកន្លែង នៅផ្លូវកំពុងស្ពាន ស្ថិតនៅក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន។

នេះបើតាមការឱ្យដឹងពី ភ្នាក់ងារ GRK News ប្រចាំខេត្តស្វាយរៀង បានឱ្យដឹងថា ជនសង្ស័យទាំង០៣នាក់ ដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះរួមមានឈ្មោះៈ
០១. ឡេ យ៉ាងហាយ ភេទប្រុស អាយុ ៣៣ឆ្នាំ ជនជាតិវៀតណាម មុខរបរមិនពិតប្រាកដ មានទីលំនៅបច្ចុប្បន្នភូមិអាប់សីុងឡ ឃុំសាឡេងហីុង ស្រុកបេនកូវ ខេត្តតាយនិញ ប្រទេសវៀតណាម
០២. តាំង នាង ភេទស្រី អាយុ ៤៤ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្នភូមិតាបិប សង្កាត់បាវិត ក្រុងបាវិត ខេត្តស្វាយរៀង
០៣. ង្វៀន ទ្រុងទ្រឹក ភេទប្រុស អាយុ៤២ឆ្នាំ ជនជាតិវៀតណាម មុខរបរមិនពិប្រាកដ មានទីលំនៅបច្ចុប្បន្នភូមិ០៦ សង្កាត់ឡុងថាន់ ក្រុងមីថ ខេត្តទៀងយ៉ាង ប្រទេសវៀតណាម។

ភ្នាក់ងារដដែល បានបញ្ជាក់ឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានចាប់យកវត្ថុតាងមួយចំនួនពីជនសង្ស័យរួមមានៈ
០១.ថ្នាំញៀនប្រភេទម៉ាទឹកក ចំនួន០៤កញ្ចប់
០២.ទូរស័ព្ទ ចំនួន០២គ្រឿង
០៣. ឧបករណ៍សម្រាប់កាច់កម៉ូតូចំនួន ០២
០៤. សឺុរ៉ាងសម្រាប់ចាក់ថ្នាំចំនួន ០២
០៥. សម្ភារៈសម្រាប់ប្រើប្រាស់គ្រឿងញៀនមួយចំនួនធំ។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្តតាមនីតិវិធី៕

(អត្ថបទៈ ម៉ាន់ ដាវីត)