បន្ទាយមានជ័យៈ នៅវេលាម៉ោង២០ និង៣០នាទី ថ្ងៃទី២០ ខែមករា ឆ្នាំ២០១៧ កម្លាំងមូលដ្ឋានកងរាជអាវុធហត្ថក្រុងសិរីសោភ័ណ បានចុះល្បាតក្នុងភូមិស្រ្តក្រុងសិរីសោភ័ណ លុះមកដល់ចំណុចភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានប្រទះឃើញបុរស០៣នាក់ ឈរនិយាយទូរស័ព្ទនៅទីងងឹត ដោយមានការសង្ស័យកម្លាំងអាវុធហត្ថ បានធ្វើការឃាត់ខ្លួនមកសាកសួរ។

ក្រោយពីធ្វើការសាកសួរហើយ និងបានឆែកឆេរនៅលើខ្លួនរកឃើញវត្ថុតាងថ្នាំញៀនប្រភេទមេតំហ្វេតាមីន ទឹកកក ចំនួន០២កូនថង់ថ្លា ដែលមានទម្ងន់០,៧៦ក្រាម ទូរស័ព្ទដៃចំនួន០២គ្រឿង និងកាំបិតកៃចំនួន០១។

លោកវរសេនីយ៍ត្រី ភឿក ព្រហ្ម បានឲ្យដឹងទៀតថា ក្រោយពីឃាត់ខ្លួនជនសង្ស័យទាំង០៣នាក់ និងដកហូតបានថ្នាំញៀនហើយនោះ ជនសង្ស័យទាំង០៣នាក់ ព្រមទាំងវត្ថុតាងត្រូវបានបញ្ជូនមកបញ្ជាការដ្ឋានកងរាជអាវុធហត្ថខេត្ត ដើម្បីសាកសួរបន្ត។

លោកវរសនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារបទល្មើសគ្រឿងញៀនបានប្រាប់ឲ្យដឹងថា ជនសង្ស័យទាំង០៣នាក់មានឈ្មោះ ៈ
១/ឈ្មោះ ទឹង សុភ័ក្រ ភេទប្រុស អាយុ៣៤ឆ្នាំ រស់នៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ
២/ឈ្មោះ ងិន វណ្ណា ភេទប្រុស អាយុ២៤ឆ្នាំ រស់នៅអង្គារបុស្ស សង្កាត់កោះពងសត្វ ក្រុងសិរីសោភ័ណ ខេត្តបន្ទាយមានជ័យ
៣/ឈ្មោះ រុំ មមិត្ត ភេទប្រុស អាយុ២១ឆ្នាំ រស់នៅភូមិអង្គារបុស្ស សង្កាត់កោះពងសត្វ ក្រុងសិរីសោភ័ណ ខេត្តបន្ទាយមានជ័យ។

លោកវរសេនីយ៍ឯក ស ប៊ុនសឿង បានប្រាប់ឲ្យដឹងទៀតថា នៅចំពោះមុខអាវុធហត្ថ ជនសង្ស័យទាំង០៣នាក់ បានឆ្លើយសារភាពថា ពួកគេបានទិញថ្នាំញៀននេះយកមកទុកប្រើប្រាស់ពិតប្រាកដមែន។

ក្រោយពីបានចម្លើយសារភាព និងមានវត្ថុតាងជាក់លាក់ ជនសង្ស័យទាំង០៣នាក់ត្រូវបានអាវុធហត្ថជំនាញកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់។

(អត្ថបទៈ ឡាក់ ភី)