ភ្នំពេញ៖ ថ្ងៃទី២៣ ខែមករា ឆ្នាំ២០១៧ នៅសាលប្រជុំអគារសេនាធិការដ្ឋាន នៃទីបញ្ជាការ កងរាជអាវុធហត្ថលើផ្ទៃប្រទេស កងរាជអាវុធហត្ថ បានបើកកិច្ចប្រជុំបូកសរុបលទ្ធផលការងាររបស់ខ្លួនក្នុងឆ្នាំ២០១៦​ និង
រៀបចំដាក់ចេញទិសដៅការងារសម្រាប់ឆ្នាំ២០១៧។ កិច្ចប្រជុំនេះ បានប្រព្រឹត្តទៅក្រោមអធិបតីភាព ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងមានការអញ្ជើញចូលរួមពីសំណាក់ ឯកឧត្តម ឧត្តមសេនីយ៍ មេបញ្ជាការរង ស្នងការ នាយរងសេនាធិការដ្ឋាន នាយកសាលាទាំង២ មេបញ្ជាការកងរាជអាវុធហត្ថរាជធានី ខេត្ត ព្រមទាំងលោក វរសេនីយ៍ នាយការិយាល័យ មេបញ្ជាការអង្គភាពចំណុះកងរាជអាវុធហត្ថលើផ្ទៃប្រទេសបានចូលរួមផងដែរ សរុបរួមចំនួន១១៤រូប។ រហូតដល់ម៉ោង១៥និង៣០នាទី ថ្ងៃខែឆ្នាំដដែល បានប្រារព្ធពិធីបិទអង្គប្រជុំ ក្រោមអធិបតីភាព ឯកឧត្តម នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ដំណើរការកិច្ចប្រជុំរយៈពេល១ថ្ងៃនោះ បានរកឃើញចំណុចខ្លាំងដែលលេចធ្លោ និងចំណុចខ្វះចន្លោះសេសសល់មួយចំនួន ជាបញ្ហាប្រឈម ដែលត្រូវតែរៀបចំផែនការការងារសម្រាប់អនុវត្តឆ្នាំ២០១៧មានជាអាទិ៍៖

ចំណុចខ្លាំងដែលលេចធ្លោ៖ កងរាជអាវុធហត្ថ សម្រេចបាននូវភារកិច្ចស្នូលរបស់ខ្លួននោះ គឺការចូលរួមចំណែកថែរក្សា ការពារ​សន្តិ​សុខ សណ្តាប់ធ្នាប់ ស្ថិរភាពនយោបាយ ដែលជាគោលនយោបាយអាទិភាពរបស់​រាជរដ្ឋា​ភិ​បាល។ ជាពិសេស គឺបានធ្វើការស្រាវជ្រាវបង្ក្រាបបណ្តាបទ​ល្មើស ពង្រឹងការអនុវត្តច្បាប់ និង​ចូល​រួម​សកម្ម​ភាព​សង្គម។ បានធ្វើការហ្វឹកហ្វឺន បណ្តុះបណ្តាល និងបំប៉នជំនាញ ព្រមទាំងបានធ្វើការអប់រំចិត្តសាស្ត្រ​។ បានកសាងសំណង់ ជំរំ បន្ទាយ កន្លែងធ្វើការមានលក្ខណៈជាយុទ្ធសាស្ត្រ និងជាប្រវត្តិសាស្ត្រ។ បានចិញ្ចឹម ថែទាំសុខមាលភាពកម្លាំង និងអនុវត្តល្អនូវគោលនយោបាយ។ បានថែទាំ ប្រើប្រាស់ ទុក​ដាក់បានគត់មត់នូវរាល់មធ្យោបាយ សម្ភារៈបំពាក់​ និងគ្រប់គ្រងអចលនទ្រព្យ​ដោយ​មានបញ្ជី​ស្នាម​ត្រឹមត្រូវ។ អង្គភាពទាំងមូល មានសាមគ្គី ឯកភាព មានកិច្ចសហប្រតិបត្តិការ មានទំនាក់ទំនងល្អជាមួយ​សាធារណជន និងមានវិន័យ ទន្ទឹមនឹងនោះ នាយទាហាន នាយទាហានរង និងពលទាហាននៃកងរាជអាវុធហត្ថគ្រប់ឋានានុក្រម ក្តាប់ជាប់នូវតួនាទី ភារកិច្ច និងមានឆន្ទៈ ស្មារតីទទួលខុសត្រូវខ្ពស់។

កងរាជអាវុធហត្ថ​បាន​ដាក់ចេញនូវទិសដៅការងារឆ្នាំ២០១៧ ដូចខាងក្រោម៖

1. បន្តធ្វើការស្រាវជ្រាវនិងបង្ក្រាបបទល្មើសឃាតកម្ម, ប្លន់ប្រដាប់អាវុធ, លួចឆក់, ចាប់ជំរិត, ការ​រក្សា លាក់​ទុក ទិញលក់អាវុធដោយខុសច្បាប់ និងបទល្មើសព្រហ្មទណ្ឌផ្សេងទៀត។
2. បន្តធ្វើការស្រាវជ្រាវនិងបង្ក្រាបបទល្មើសគ្រឿងញៀន។
3. បន្តធ្វើការស្រាវជ្រាវនិងបង្ក្រាបបទល្មើសជួញដូរមនុស្ស។
4. បន្តសហការពង្រឹងការអនុវត្តច្បាប់ និងបទបញ្ជា ដើម្បីទប់ស្កាត់និងបង្ក្រាបបទល្មើសធនធាន​ធម្មជាតិ។
5. បន្តសហការពង្រឹងការអនុវត្តច្បាប់ទប់ស្កាត់និងបង្ក្រាបបទល្មើសគេចវេះពន្ធគយ ពន្ធដារ គៀង​គរ​ចំណូល​ចូលថវិកាជាតិ។
6. បង្កើននិងពង្រឹងការត្រួតពិនិត្យអាវុធជាតិផ្ទុះ ការប្រើប្រាស់មធ្យោបាយអង្គភាពទ័ព និងសណ្តាប់​ធ្នាប់​វិន័យកងទ័ព នៅតាមទីសាធារណៈ។
7. ការពារសន្តិសុខជូនឥស្សរជន និងគណៈប្រតិភូបរទេសដែលមកបំពេញបេសកកម្ម និងទស្សន​កិច្ច​នៅកម្ពុជា ព្រមទាំងភ្ញៀវទេសចរណ៍។
8. ពង្រឹងការការពារអង្គភាព ស្ថាប័នរបស់រដ្ឋ និងគោលនយោបាយ សេដ្ឋកិច្ច ពាណិជ្ជកម្ម ការទូត ព្រលានយន្តហោះអន្តរជាតិ កំពង់ផែ តំបន់ទេសចរណ៍ និងរមណីយដ្ឋាននានា។ល។
9. ការពារការបោះឆ្នោតជ្រើសរើសក្រុមប្រឹក្សាឃុំ សង្កាត់។
10. បន្តចូលរួមសហការរៀបចំសណ្តាប់ធ្នាប់ទូទៅ។
11. ត្រៀមកម្លាំង មធ្យោបាយ សម្ភារៈ ឧបករណ៍ សម្រាប់ធ្វើអន្តរាគមន៍ទប់ស្កាត់និងបង្ក្រាបរាល់ការ​បង្ក​​ចលាចលសង្គមតាមគ្រប់រូបភាព និងជួយសង្គ្រោះនូវរាល់គ្រោះមហន្តរាយផ្សេងៗ​ដែលនឹង​កើត​​មាន​ឡើង​ជាពិសេសជួយជីវិតមនុស្ស។
12. បន្តអនុវត្តដីកាតុលាការ។
13. បន្តធ្វើការងារអប់រំចិត្តសាស្ត្រ​ សំដៅធ្វើឱ្យនាយទាហាន នាយទាហានរង និង​ពល​ទាហានគ្រប់​លំដាប់​ថ្នាក់ ក្តាប់ជាប់និងយល់ដឹងច្បាស់លាស់នូវតួនាទី ភារកិច្ច ការទទួលខុស​ត្រូវ នីតិវិធី​ការ​ងារ និងបទ​បញ្ជា​ផ្ទៃក្នុងកងរាជអាវុធហត្ថ។ គោរពវិន័យ គោរពច្បាប់ និងបទបញ្ជា។ មាន​សតិ​អារម្មណ៍​ហ្នឹង ស្មារតី​អង់​អាចក្លាហាន ក្នុងការបំពេញភារកិច្ច។ មានសាមគ្គី ឯកភាពផ្ទៃ​ក្នុងរឹងមាំ និង​ស្មារតី​សហការ។ មាន​ទំនាក់​ទំនងល្អជាមួយមហាជន ប្រជាជន កសាងជំនឿ និង​ការ​ស្រលាញ់​ទុក​ចិត្ត​ពី​ប្រជាជន​គ្រប់​មជ្ឈដ្ឋាន មកលើបុគ្គលិក និងអង្គភាពកងរាជអាវុធហត្ថ។ និង​មាន​ស្មារតី​ប្រុង​ប្រយ័ត្ន​ខ្ពស់​រាល់ឧបាយកល​លួង​លោម បោកបញ្ឆោត អូសទាញ ទិញទឹកចិត្ត។ល។
14. បន្តធ្វើការហ្វឹកហ្វឺនបណ្តុះបណ្តាលជំនាញ សំដៅធ្វើឱ្យនាយទាហានគ្រប់លំដាប់ថ្នាក់ និងនាយ​ទាហាន​រង ពលទាហានគ្រប់រូបស្គាល់ ចេះ ប្រើប្រាស់ និងថែទាំ ទុកដាក់ឧបករណ៍​ សម្ភារៈ មធ្យោបាយ គ្រប់​ប្រភេទ ថែមទាំង​មានភាពស្ទាត់ជំនាញក្នុងការប្រើប្រាស់។
15. បន្តថែទាំជួសជុលសំណង់អគារដែលមានស្រាប់ បំផុសលើកទឹកចិត្តចលនាកសាងសំណង់ថ្មីរឹងមាំ និង​មានរចនាបទជាអត្តសញ្ញាណជាតិ។ យកចិត្តទុកដាក់គ្រប់គ្រងដីធ្លី អចលនទ្រព្យ គ្រឿងសង្ហារឹម​មាន​បញ្ជី​ស្នាមច្បាប់លាស់។
16. បន្តយកចិត្តទុកដាក់ថែទាំ ជួសជុលមធ្យោបាយ ឧបករណ៍ សម្ភារៈដែលកំពុងប្រើប្រាស់ដោយ​ស្មារតី​សន្សំ​​សំចៃ។ លើកទឹកចិត្តការស្វះស្វែងទិញបំពាក់ថ្មី ដើម្បីបម្រើការហ្វឹកហ្វឺនរៀនសូត្រ និ​ងប្រតិ​បត្តិ​ការ។
17. បន្តធ្វើការសិក្សាកែសម្រួលរចនាសម្ពន្ធចាត់តាំង រៀបចំបុគ្គលិកតម្រង់ទិសឱ្យចំជំនាញ ដើម្បី​ពង្រឹង​ប្រសិទ្ធ​ភាពការងារ។ ប្រមូលផ្តុំកម្លាំងដោះស្រាយសំណូមពរភារកិច្ចចាំបាច់។
18. បន្តយកចិត្តទុកដាក់លើកកម្ពស់ជីវភាពរស់នៅ ការហូបចុក អនាម័យ ស្លៀកពាក់ រស់នៅ និង​ពិនិត្យ​ព្យាបាល។ បំផុសចលនាលើកទឹកចិត្តដាំដំណាំ និងចិញ្ចឹមសត្វ ដើម្បីកែលម្អការហូបចុក។
19. បន្តយកចិត្តទុកដាក់អនុវត្តគោលនយោបាយដោះស្រាយទុក្ខលំបាក និងការសរសើរលើកទឹកចិត្ត​អង្គភាព ស្ថាប័ន និងបុគ្គលបង្កើតបានស្នាដៃ។
20. ពង្រឹងការងារតែងតាំងមុខតំណែង ដំឡើងឋានន្តរសក្តិ ដោយពិនិត្យវាយតម្លៃទៅលើការសិក្សា​រៀន​សូត្រ បទពិសោធន៍ការងារ ស្នាដៃ និងការស្រលាញ់គាំទ្រពីមហាជនជុំវិញ។
21. បន្តជំរុញលើកទឹកចិត្តបង្កលក្ខណៈការងារទំនាក់ទំនងកិច្ចការសាធារណជន ធ្វើការផ្សព្វផ្សាយជូន​សាធារណជននូវសកម្មភាព សមិទ្ធផល និងស្នាដៃដែលកងរាជអាវុធហត្ថសម្រេចបាន ព្រមទាំង​ធ្វើ​ការ​ឆ្លើយតបទាន់ពេលវេលានូវរាល់ព័ត៌មានលាបពណ៌មកលើបុគ្គលិក ក៏ដូចជាអង្គភាពកងរាជ​អាវុធ​ហត្ថ។
22. ពង្រឹងការងារដឹកនាំ បញ្ជា គ្រប់គ្រងទាំងបុគ្គលិក មធ្យោបាយ សម្ភារៈ យន្តការរដ្ឋបាល របៀប​របប​ធ្វើ​ការ ការទុកដាក់រក្សាឯកសារ និងអនុវត្តវិន័យយ៉ាងម៉ឺងម៉ាត់ចំពោះនាយទាហាន នាយទាហាន​រង និង​ពលទាហានណាដែលបំពាន ល្មើសច្បាប់ស្តីពីលក្ខន្តិកៈទូទៅចំពោះយោធិននៃ​កង​យោធ​ពល​ខេមរ-​​ភូមិន្ទ និងបទវិន័យទូទៅសម្រាប់កងយោធពលខេមរភូមិន្ទ។
23. ជំរុញការងារសិក្សាចងក្រងបទពិសោធន៍ការងារល្អ បញ្ចូលក្នុងកម្មវិធីសិក្សា និងធ្វើសិក្ខាសាលា​ជំនាញ​​រយៈ​ពេលខ្លីៗ ដើម្បីឆ្លើយតបទាន់ពេលវេលានូវសំណូមពរភារកិច្ច។
24. បន្តចូលរួមធ្វើសកម្មភាពសង្គម ដើម្បីគាំទ្រការអនុវត្តគោលនយោបាយនានារបស់រាជរដ្ឋាភិ​បាល។

(អត្ថបទៈ ឧ.អេង ហីុ)