ឧត្តរមានជ័យៈ បុរសជាក្មេងទំនើងម្នាក់ ត្រូវបានកម្លាំងមូលដ្ឋាន កងរាជអាវុធហត្ថស្រុកចុងកាល់ បានធ្វើការឃាត់ខ្លួន នៅវេលាម៉ោង ១៦ និង៣០នាទី ថ្ងៃទី៣០ ខែមករា ឆ្នាំ២០១៧ ស្របពេលដែលក្មេងទំនើងខាងលើនេះ កំពុងធ្វើសកម្មភាពបង្ហោះម៉ូតូ នៅចំណុចភូមិព្រៃធំ ឃុំ ចុងកាល់ ស្រុក ចុងកាល់ ខេត្តឧត្តរមានជ័យ។

នេះបើតាមការឱ្យដឹង ពីមន្ត្រីកងរាជអាវុធហត្ថស្រុកចុងកាល់ បានឱ្យដឹងថា ក្មេងទំនើងដែលត្រូវបានកម្លាំងកងរាជអាវុធហត្ថធ្វើការឃាត់ខ្លួននោះមានឈ្មោះ ប៊ី សុគង ភេទប្រុស អាយុ៣១ឆ្នាំមុខរបរ បេីកអេសស្ការកាយដី រស់នៅភូមិសំរោង ឃុំ ឃ្លាំងហាយ ស្រុក ស្រីស្នំ ខេត្តសៀមរាប។

មន្ត្រីដដែល បានបញ្ជាក់ឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងមួយចំនួនរួមមានៈ
១. ម៉ូតូ ចំនួន០១គ្រឿង ម៉ាកND ១២៥ME
២. លុយបាត ចំនួន១០០០បាត
៣. លុយខ្មែរ ចំនួន១០៧៦០០រៀល
៤. ទូរស័ព្ទដៃ ចំនួន០២គ្រឿង និងឧបករណ៍សម្រាប់សេពគ្រឿងញៀនមួយចំនួន។

សង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អត្ថបទៈ ម៉ាន់ ដាវីត)