បន្ទាយមានជ័យៈ នៅរសៀលថ្ងៃទី០៤ ខែកុម្ភៈ ឆ្នាំ២០១៧ កម្លាំងកងរាជអាវុធហត្ថខេត្តបន្ទាយមានជ័យ សហការជាមួយកម្លាំងមូលដ្ឋានកងរាជអាវុធហត្ថស្រុកថ្មពួក បានចុះប្រតិបត្តិការបង្ក្រាបករណីជួញដូរគ្រឿងញៀន០១កន្លែង ស្ថិតនៅចំណុចភូមិត្រពាំងសំរោង ឃុំគោករមៀត ស្រុកថ្មពួក ខេត្តបន្ទាយមានជ័យ។
ក្នុងប្រតិបត្តិការ បង្ក្រាបបទល្មើសខាងលើនេះផងដែរ កម្លាំងកងរាជអាវុធហត្ថ ក៏បានធ្វើការឃាត់ខ្លួនជនសង្ស័យបានចំនួន០៣នាក់ ហើយបានធ្វើការចាប់យកវត្ថុតាងមយចំនួនរួមមានៈ
០១. ថ្នាំញៀនប្រភេទមេតំហ្វេតាមីនទឹកកកចំនួន០២កញ្ចប់ ស្មើនឹងទម្ងន់០,៦៨ក្រាម
០២. ថ្នាំញៀនប្រភេទមេតំហ្វេតាមីនគ្រាប់(យ៉ាម៉ា)ចំនួន១៥៥គ្រាប់
០៣. ទូស័ព្ទដៃ០៣គ្រឿង
០៤. ម៉ូតូ០១គ្រឿង
០៥. កាំភ្លើងឆ្នៃ០១ដើម
០៦. កាំបិតខ្វាវ០១ដើម
០៧. កាំបិតសាំម៉ូរ៉ៃ០១ដើម
០៨. កូនកាំបិតបត់០១ដើម
០៩. នាឡិកាដៃ០២គ្រឿង និងចិញ្ចៀនចំនួន០១វង់។
នេះបើតាមការឱ្យដឹងពីមន្ត្រីកងរាជអាវុធហត្ថខេត្តបន្ទាយមានជ័យ បានបញ្ជាក់ឲ្យដឹងថា ជនសង្ស័យទាំង០៣នាក់ ដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះរួមមានឈ្មោះៈ
០១. យ៉ែម ពៅ ភេទប្រុស អាយុ៣៧ឆ្នាំ មុខរបរជាកម្មករ
០២. ភួង វ៉ា ភេទស្រី អាយុ៤៥ឆ្នាំ មុខរបរជាកម្មករ
០៣. ងឹម សាមឿន ភេទប្រុស អាយុ៣០ឆ្នាំ មុខរបរជាកម្មករ។ អ្នកទាំង០៣ រស់នៅក្នុងភូមិត្រពាំងសំរោង ឃុំគោករមៀត ស្រុកថ្មពួក ខេត្តបន្ទាយមានជ័យ។
ជនសង្ស័យ និងវត្ថុតាងត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្តតាមនីតិវិធី។
(អត្ថបទៈ ម៉ាន់ ដាវីត)
