ពោធិ៍សាត់ៈ ជនសង្ស័យចំនួន០៣នាក់ ត្រូវបានកម្លាំងមូលដ្ឋាន កងរាជអាវុធហត្ថស្រុកបាកាន បានធ្វើការឃាត់ខ្លួន ជាប់ពាក់ព័ន្ធជាមួយករណីលួច សត្វគោ។

តាមការឱ្យដឹងពី មន្ត្រីមូលដ្ឋាន កងរាជអាវុធហត្ថស្រុកបាកាន បានឱ្យដឹងថា ក្នុងការឃាត់ខ្លួនជនសង្ស័យខាងលើនេះ គឺធ្វើឡើង នៅវេលាម៉ោង០៩ និង៣០នាទី ព្រឹកថ្ងៃទី០៨ ខែកុម្ភៈ ឆ្នាំ២០១៧ ស្ថិតនៅចំណុចភូមិនិគមន៍ ឃុំស្វាយដូនកែវ ស្រុកបាកាន ខេត្តពោធិ៍សាត់ ។

មន្ត្រីដដែលបានបន្តឱ្យដឹងទៀតថា ជនសង្ស័យដែលត្រូវបានកម្លាំងកងរាជអាវុធហត្ថ ធ្វើការឃាត់ខ្លួននោះរួមមានឈ្មោះ ៈ
០១. ស សិត ភេទប្រុស អាយុ២១ឆ្នាំ ខ្មែររស់នៅភូមិអូរតាប៉ោង ឃុំអូរតាប៉ោង ស្រុកបាកាន ខេត្តពោធិ៍សាត់
០២. ថង សុខថន ភេទប្រុស អាយុ៣៥ឆ្នាំ ខ្មែររស់នៅភូមិនិគមន៍ ឃុំស្វាយដូនកែវ ស្រុក បាកាន ខេត្តពោធិ៍សាត់
០៣. ខុន នី ភេទប្រុស អាយុ៣២ឆ្នាំ ខ្មែររស់នៅភូមិកំពោតអាង ឃុំស្វាយដូនកែវ ស្រុកបាកាន ខេត្តពោធិ៍សាត់។

មន្ត្រីដដែល បានបន្តអោយដឹងទៀតថា ក្នុងប្រតិបត្តិការបង្ក្រាបបទល្មើសខាងលើនេះផងដែរ កម្លាំងកងរាជអាវុធហត្ថ ក៏បានចាប់យកវត្ថុតាង ពីជនសង្ស័យរួមមាន សត្វគោចំនួន០១ក្បាល។

មន្ត្រីដដែល បានបញ្ជាក់អោយដឹងទៀតថា ការឃាត់ខ្លួនជនសង្ស័យខាងលើនេះ គឺធ្វើឡើងតាមពាក្យបណ្តឹងរបស់ជនរងគ្រោះ ដែលជាម្ចាស់គោ មានឈ្មោះ យ៉ែម ញឹប ភេទប្រុស អាយុ៤៨ឆ្នាំ ខ្មែររស់នៅភូមិអូររំចេក ឃុំត្រពាំងជង ស្រុកបាកាន ខេត្តពោធិ៍សាត់ ដែលបានចោទប្រកាន់ជនសង្ស័យខាងលើ ថាបានលួចគោរបស់ខ្លួន។

ជនសង្ស័យ ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្តតាមនីតិវិធី៕ ចំណែកសត្វគោ ត្រូវបានប្រគល់ជូនម្ចាស់ដើមវិញ។

(អត្ថបទ ម៉ាន់ ដាវីត)