បន្ទាយមានជ័យ៖ នៅថ្ងៃទី២៨ ខែកញ្ញា ឆ្នាំ២០១៥ ចូលមកដល់គឺជាថ្ងៃបុណ្យកាន់បិណ្ឌទី១ ដែលប្រជាពលរដ្ឋខ្មែរ អ្នកកាន់ព្រះពុទ្ធសាសនា អញ្ជើញទៅប្រារព្ធពិធីបុណ្យកាន់បិណ្ឌទៅតាមទំនៀមទម្លាប់ប្រពៃណីខ្មែរ នៅតាមទីអារាមនានារៀងៗខ្លួន។ដោយឡែកនៅថ្ងៃទី២៨ ខែកញ្ញា នេះផងដែរលោកវរៈសេនីយ៍ឯក ស៊ុន សម្បត្តិ មេបញ្ជាការងកងរាជអាវុធហត្ថខេត្តបន្ទាយមានជ័យតំណាងឲ្យ ឯកឧត្ដម ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យនិងមន្ត្រីក្រោមឱវាទជាច្រើននាក់ បាននាំយកចង្ហាន់ ទេយ្យទាន និងថវិកាមួយចំនួនដូចជាអង្ករ ៣ការុង ទឹកសុទ្ធ១០កេះ ទឹកផ្លែឈើ៥កេះ ថវិការ៣លាន៥សែននិង៣ម៉ឺនរៀលសំរាប់តាជីនិងដូនជី១២៥នាក់១នាក់៤ពាន់រៀលសំរាប់វត្តស្រះរាំងនិងវត្តដងរុណមានអង្ករ៣បេទឹកបរិសុទ្ធ៩កេះ ទឹកផ្លែឈើ៥កេះនិងបច្ច័យ២លាន៤សែននិង៤ម៉ឺនរៀល អញ្ជើញទៅចូលរួមថ្ងៃបុណ្យកាន់បិណ្ឌទី១ នៅវត្តស្រះរាំងនិងវត្តដងរុណ ក្នុងឃុំស្រះរាំង ស្រុកមង្គលបូរីខេត្តបន្ទាយមានជ័យនេះ។លោក ស៊ុន សម្បត្តិ បាននិយាយថាគ្រឿងឧបភោគបរិភោគនិងបច្ច័យទាំងអស់នោះដើម្បីយកទៅដាក់បាត្រប្រគេនព្រះសង្ឃ បង្សុកូលសមាទានសីល ឧទ្ទិសកុសលផលបុណ្យទៅដល់ឪពុក ម្តាយ ជីដូនជីតា សាច់ញាតិសណ្តាន ដែលបានចែកឋានទៅលោកខាងមុខ សូមឲ្យទៅកាន់សុគតិភពកុំបីឃ្លៀងឃ្លាតឡើយ និងសូមឲ្យកូនចៅនៅខាងក្រោយឲ្យបានជួបតែនិងសេចក្តីសុខអាយុយឺនយូរ រកស៊ីមានបាន និងរីកចម្រើនគ្រប់ភារកិច្ច។លោកបានបន្តទៀតថាពិធីបុណ្យកាន់បិណ្ឌនេះ មានរយៈពេល ១៤ថ្ងៃ គឺចាប់ផ្តើមពីថ្ងៃទី២៨ ខែកញ្ញានេះ រហូតដល់ថ្ងៃ១៤រោច ខែភទ្របទ ត្រូវនឹងថ្ងៃទី១១ ខែតុលា ហើយនៅថ្ងៃទី១២តុលា ត្រូវនឹងថ្ងៃ១៥រោច ខែភទ្របទ គឺជាថ្ងៃបុណ្យភ្ជុំបិណ្ឌ។ជារៀងរាល់ពេលព្រឹក ពុទ្ធបរិស័ទខ្មែរកាន់ព្រះពុទ្ធសាសនា តែងបានយកចង្ហាន់ ទៅប្រគេនព្រះសង្ឃ ដើម្បីបង្សុកូលឧទ្ទិសកុសលផលបុណ្យ បញ្ជូនទៅញាតិសន្តាន ដែលចែកឋានទៅ។នៅរៀងរាល់ល្ងាច ក្នុងអំឡុងពេលកាន់បិណ្ឌ និងភ្ជុំបិណ្ឌនេះ ពុទ្ធបរិស័ទ បាននាំគ្នាទៅវត្តស្តាប់ព្រះសង្ឃ ចម្រើនព្រះបរិត្ត និងទេសនា។ នៅពេលព្រលឹមស្រាងៗគ្រប់វត្តអារាម ព្រះសង្ឃសូត្របរាភវសូត្រ និងសូត្រធម៌។ មានកន្លែងខ្លះ ពុទ្ធបរិស័ទក្រោកពីព្រលឹមទៅបោះបាយបិណ្ឌទៅតាមទនៀមទម្លាប់ប្រពៃណីខ្មែរ នៅតាមខឿនព្រះវិហារ ដោយគេយល់ថា ពួកប្រេតតែងតែមកពេលងងឹត រកចំណីបរិភោគក្នុងថ្ងៃបុណ្តភ្ជុំបិណ្យនេះ៕
