បន្ទាយមានជ័យៈ នៅយប់ថ្ងៃទី១៩ ខែកុម្ភៈ ឆ្នាំ២០១៧ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានចុះល្បាតដើម្បីរក្សាសន្តិសុខ សណ្ដាប់ធ្នាប់ ជូនប្រជាពលរដ្ឋ នៅក្នុងភូមិសាស្រ្តក្រុងប៉ោយប៉ែត នៅចំណុចកាសីុណូហ្គោដិន ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ស្រាប់តែប្រទះឃើញជនសង្ស័យម្នាក់ កំពុងសេពគ្រឿងញៀន ពេលនោះកម្លាំងអាវុធហត្ថក៏បានធ្វើការឃាត់ខ្លួនភ្លាមៗ ហើយបានឆែកឆេរក្នុងខ្លួនជនសង្ស័យ ក៏បានរកឃើញវត្ថុតាងរួមមាន គ្រឿងញៀនប្រភេទមេតំហ្វេតាមីនទឹកកកចំនួន០១កូនថង់តូច ស្មើនឹងទម្ងន់០,៥២ក្រាម ទូរស័ព្ទដៃ០២គ្រឿង និងសម្ភារៈជក់គ្រឿងញៀនមួយចំនួន។

លោកវរសេនីយ៍ឯក ស ប៊ុនសឿង មេបញ្ជាការរង កងរាជអាវុធហត្ថខេត្តបន្ទាយមានជ័យ ទទួលការងារបទល្មើសគ្រឿងញៀនបានឲ្យដឹងថា ជនសង្ស័យដែលត្រូវបានឃាត់ខ្លួននោះ មានឈ្មោះហៃ ហេង ភេទប្រុស អាយុ២៧ឆ្នាំ រស់នៅបន្ទប់ជួលស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

លោកវរសេនីយ៍ឯក បានបន្តឲ្យដឹងទៀតថា នៅមុខមន្ត្រីកងរាជអាវុធហត្ថ ជនសង្ស័យបានឆ្លើយសារភាពថា ខ្លួនគេពិតជាទិញថ្នាំញៀន០១កូនថង់តូច ក្នុងតំលៃ៧០០បាត(ប្រាក់ថៃ)យកមកទុកប្រើប្រាស់ជាមួយមិត្តភ័ក្ក ពិតប្រាកដមែន។

ក្រោយពីទទួលបានចម្លើយសារភាពរួចហើយ ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អត្ថបទៈ ឡាក់ ភី)