បន្ទាយមានជ័យៈ នៅវេម៉ោង២០ ថ្ងៃទី១៩ ខែកុម្ភះ ឆ្នាំ២០១៧ នៅចំណុចភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានករណីឆក់កាបូប ចំនួន០១លើក កើតឡើង បណ្តាអោយជនរងគ្រោះម្នាក់ បាត់បង់សម្ភារៈមួយចំនួន។

មន្ត្រីមូលដ្ឋាន កងរាជអាវុធហត្ថក្រុងប៉ោយប៉ែត បានឲ្យដឹងថា ជនរងគ្រោះ ឈ្មោះស៊ុំ ប៉ែនរ៉ន ភេទស្រី អាយុ៣០ឆ្នាំ រស់នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានជិះម៉ូតូជាមួយកូនរបស់ខ្លួន លុះជិះមកដល់ចំណុចកើតហេតុខាងលើ ស្រាប់តែមានជនសង្ស័យជិះម៉ូតូតាមពីក្រោយ ហើយធ្វើសកម្មភាពឆក់កាបូបស្ពាយ របស់ជនរងគ្រោះរួចគេចខ្លួនបាត់។

ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅអាវុធហត្ថក្រុងប៉ោយប៉ែត។

មន្ត្រីមូលដ្ឋាន កងរាជអាវុធហត្ថក្រុងប៉ោយប៉ែត បានបន្តឲ្យដឹងទៀតថា ក្រោយពីបានទទួលពាក្យបណ្តឹងរបស់ជនរងគ្រោះរួចមក ទើបកម្លាំងអាវុធហត្ថក្រុងប៉ោយប៉ែត បានចុះធ្វើការស្រាវជ្រាវរហូតដល់ម៉ោង២៣ ទើបឃាត់ខ្លួនជនសង្ស័យបាន នៅចំណុចផ្លូវដើមពុទ្រ្ទា ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ក្នុងខណ:ពេលជនសង្ស័យបំរុងយកទូរស័ព្ទទៅលក់នៅទីនោះ។

លោកវរសេនីយ៍ត្រី ជា ដា បានឲ្យដឹងទៀតថា ជនសង្ស័យមានឈ្មោះ ជិន សុផារិទ្ធ ភេទប្រុស អាយុ រស់នៅភូមិបាលិលេយ្យ២ សង្កាត់និងក្រុងប៉ោយប៉ែត ខេត្តបន្ទាយមានជ័យ រួមជាមួយវត្ថុតាងរួមមានទូរស័ព្ទដៃម៉ាកអាយហ្វូនស៊ិច ចំនួន០១គ្រឿង និងប្រាក់ថៃចំនួន៧០០០បាត(ប្រាំពីរពាន់បាត)។

ជនសង្ស័យក្រោយពីឃាត់ខ្លួនហើយ ត្រូវបានកម្លាំងអាវុធហត្ថក្រុងប៉ោយប៉ែត បញ្ជូនមកបញ្ជាការដ្ឋានកងរាជអាវុធហត្ថខេត្ត ដើម្បីធ្វើការសាកសួរ។

លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌ បានឲ្យដឹងថា ជនសង្ស័យឈ្មោះជិន សុផារិទ្ធ នៅមុខអាវុធហត្ថបានឆ្លើយសារភាពថា ខ្លួនពិតជាបានធ្វើសកម្មភាពឆក់កាបូបពិតប្រាកដមែន។

ក្រោយពីបានចម្លើយសារភាពហើយនោះ ជនសង្ស័យត្រូវបានមន្ត្រីជំនាញកងរាជអាវុធហត្ថបានកសាងសំណុំរឿងបញ្ជូនទៅតុលាការ ដើម្បីដាក់ទោសទៅតាមផ្លូវច្បាប់ ចំណែកវត្ថុតាងដែលដកហូត ត្រូវបានមន្ត្រីកងរាជអាវុធហត្ថក្រុងប៉ោយប៉ែតប្រគល់ជូនម្ចាស់ដើមវិញ។