អហ.ខណ្ឌមានជ័យ៖ នៅចំណុចភូមិបឹងឈូក សង្កាត់ទឹកថា្ល ខណ្ឌសែនសុខ កាលពីវេលាម៉ោង១៧និង៣០នាទីល្ងាចថ្ងៃទី០១ ខែតុលា ឆ្នាំ២០១៥ កម្លាំងកងរាជអាវុធហត្ថខណ្ឌមានជ័យ បានសហការជាមួយនឹងកម្លាំងកងរាជអាវុធហត្ថក្រុងបានចុះទៅឃាត់ខ្លួនជនសង្ស័យ០៨ នាក់ ក្នុងនោះមានស្រី០២នាក់ ដែលពាក់ព័ន្ធនិងគ្រឿងញៀន ។
បើតាមប្រភពព័ត៌មានពីកងរាជអាវុធហត្ថខណ្ឌមានជ័យ បានប្រាប់ដល់គេហទំព័រ Grk.gov.kh ឲ្យដឹងថា៖ ហេតុដែលឈានដល់ការឃាត់ខ្លួនជនសង្ស័យខាងលើគឺដោយសារតែមានការចង្អុលបង្ហាញពីជនសង្ស័យម្នាក់ឈ្មោះ តាំង ឃុនលី ហៅអាខ្មៅតូច ក្នុងចំណោមបក្ខពួក០៣នាក់ ដែលកម្លាំងកងរាជអាវុធហត្ថខណ្ឌមានជ័យ បានឃាត់ខ្លួនកាលពីវេលាម៉ោង០០និង៣០នាទី ក្នុងថ្ងៃដដែល។
ក្រោយការឃាត់ខ្លួនជនសង្ស័យខាងលើ សមត្ថកិច្ចជំនាញបានចាប់ដកវត្ថុតាងរួមមាន ម្សៅក្រាមពណ៌ស៤កញ្ចប់(ធំមួយកញ្ចប់) ជញ្ជីងថ្លឹងថ្នាំមួយ ទូរស័ព្ទ០២គ្រឿង រួមទាំងប្រដាប់ប្រដាជក់មួយចំនួន ។
បច្ចុប្បន្នជនសង្ស័យខាងលើត្រូវបានកម្លាំងជំនាញសាកសួរ និងកសាងសំណុំរឿងដើម្បីចាត់ការទៅតាមនិតិវិធី៕
