ឧត្តរមានជ័យៈ នៅវេលាម៉ោង១២ និង០០នាទីរសៀល ថ្ងៃទី២៣ ខែកុម្ភៈ ឆ្នាំ២០១៧ កម្លាំងមូលដ្ឋាន កងរាជអាវុធហត្ថស្រុកត្រពាំងប្រាសាទ បានធ្វើការឃាត់ខ្លួន ជនសង្ស័យម្នាក់ ជាអនីតិជន ស្ថិតនៅចំណុចច្រកក្បាលអូរស្វាយ ភូមិអូរស្វាយ ស្រុកត្រពាំងប្រាសាទ ខេត្តឧត្តរមានជ័យ មានជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន។

នេះបើតាមការឱ្យដឹងពី មន្ត្រីកងរាជអាវុធហត្ថស្រុកត្រពាំងប្រាសាទ បានប្រាប់ភ្នាក់ងារ GRK News ឱ្យដឹងថា ជនសង្ស័យដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះមានឈ្មោះ ទូច ប្រុសភួង ភេទប្រុស អាយុ១៣ឆ្នាំ មុខរបរសិស្ស រស់នៅភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ។

មន្ត្រីដដែល បានបញ្ជាក់ឱ្យដឹងទៀតថា នៅមុនពេលកើតហេតុ កម្លាំងកងរាជអាវុធហត្ថស្រុកត្រពាំងប្រាសាទ បានចេញសកម្មល្បាតការពារសុវត្ថិភាព ជូនបងប្អូនប្រជាពលរដ្ឋ នៅចំណុចកើតហេតុខាងលើ ក៏បានប្រទះឃើញ ជនសង្ស័យខាងលើ បានស្ពាយសម្ភារជាច្រើន ដែលក្នុងនោះរួមមានគ្រឿងញៀន ដែលបំរុងឡើងទៅលើភ្នំដើម្បីច្រក ពេលនោះកម្លាំងកងរាជអាវុធហត្ថ ក៏ហាក់មានការសង្ស័យ ក៏បានសុំធ្វើការឆែកឆេរ ក៏ប្រទះឃើញ វត្ថុតាងមួយចំនួនរួមមានៈ
១. ថ្នាំញៀនប្រភេទម៉ាទឹកកក ចំនួន១៦កញ្ចប់
២. មី ចំនួន០១កេះ
៣. បារីចំនួន០១សុង
៤. ប្រហុកចំនួន០១កញ្ចប់
៥. នំនិងស្ករគ្រាប់មួយចំនួន
៦. ខារ៉ាប៉ាវចំនួន០៦កំប៉ុង
៧. ទឹកក្រូចចំនួន០៦កំប៉ុង។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អត្ថបទៈ ម៉ាន់ ដាវីត)